ვოლსკი: გამორიცხული არაფერია, მაგრამ ვადამდელი არჩევნების წინაპირობა არ არსებობს

საერთოდ არაფერია  გამორიცხული, მაგრამ ვადამდელი არჩევნების წინაპირობა ახლა არ არსებობს. ხალხი ელოდება, რომ ქვეყანა სტაბილურობას შეინარჩუნებს, - ამის შესახებ, „ქართული ოცნების“ ცენტრალურ ოფისში საპარლამენტო უმრავლესობის სხდომის დასრულების შემდეგ, ჟურნალისტებს პოლიტიკურ პარტიებთან ურთიერთობის მდივანმა და პოლიტიკური საბჭოს წევრმა, გია ვოლსკიმ განუცხადა.

„საკმაოდ საინტერესო და წინააღმდეგობრივი კენჭისყრების შემდეგ ყველას გვსურდა ჩვენი პოზიციის დაფიქსირება. გამოითქვა საქმიანი და მეგობრული წუხილი იმის გამო, რომ 12-მა დეპუტატმა უმრავლესობა დატოვა. თუმცა პროპორციულ და შერეულ სისტემაზე აზრთა სხვადასხვაობის მიუხედავად, სხდომაზე მყარად ითქვა, რომ ეს უმრავლესობა სჭირდება არა მხოლოდ „ქართულ ოცნებას“, არამედ სახელმწიფოსაც.

ყველამ იცის, რომ ე.წ. გერმანული მოდელი არ შეესაბამება დღეს მოქმედ კონსტიტუციას. ამაზე უფრო დეტალურ პასუხებს ჩვენი კონსტიტუციონალისტები გაგცემენ. სხდომაზე  სახელმწიფო ბიუჯეტზეც ვისაუბრეთ, რაც გუშინ პრემიერმინისრტთანაც განვიხილეთ. ცხინვალში უკანონო პატიმრობაში მყოფ ექიმთან დაკავშირებით იქნება განცხადება და მიმოვიხილეთ, თუ რას აკეთებენ ამ ადამიანის დასახსნელად.

მე ვხედავ, რომ ყველა აქცენტის გადატანა ბიძინა ივანიშვილზე ხდება, მაგრამ ნებისმიერ სისტემაში - შერეულსა თუ პროპორციულში - „ქართული ოცნების“ უპირატესობა არ არის განპირობებული კონკრეტული პიროვნებებით. საზოგადოებაში არსებობს გარკვეული დამოკიდებულება, როგორც ჩვენ მიმართ, ასევე ქუჩაში სპონტანურად ჩამოყალიბებული კოალიციის მიმართ. საპროტესტო აქციებზე შეკრებილი ადამიანების მიმართ ჩვენი მთავარი გზავნილი ასეთია - გავუფრთხილდეთ ჩვენს ქვეყანას და პოლიტიკური პარტიების მიმართ ჩვენი დამოკიდებულება გამოვხატოთ 2020 წლის არჩევნებზე.

საერთოდ არაფერია  გამორიცხული, მაგრამ ვადამდელი არჩევნების წინაპირობა ახლა არ არსებობს. ხალხი ელოდება, რომ ქვეყანა სტაბილურობას შეინარჩუნებს“, - განაცხადა ვოლსკიმ.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.

საპარლამენტო უმრავლესობა განმარტავს, რა სისტემით ჩატარდება 2020 წლის არჩევნები. განცხადება გაავრცელა მმართველი პარტიის ლიდერმაც. ოპოზიციური პარტიები მხარდამჭერებს პარლამენტთან აქციაზე მისვლისკენ მოუწოდებენ. 

ვინ დაუჭირა მხარი და ვინ იყო პროპორციულ საარჩევნო სისტემაზე გადასვლის წინააღმდეგი, ამ ბმულზე ნახეთ.