უსუფაშვილი ოპოზიციას: პროპორციული არჩევნების მოთხოვნა არ უნდა მოვხსნათ

პოლიტიკური პარტია „შენების მოძრაობის“ ლიდერი, დავით უსუფაშვილი ოპოზიციურ პარტიებს მიმართავს, რომ არ უნდა წამოეგონ ხელისუფლების ხაფანგზე და არ უნდა მოხსნან პროპორციული არჩევნების მოთხოვნა. ეს განცხადება უსუფაშვილმა პარტიის ოფისში გამართულ ბრიფინგზე გააკეთა. 

ის, ამ პრესკონფერენციით, პარტია „ქართული ოცნება-დემოკრატიული საქართველოს“ გენერალურ მდივან კახა კალაძის ბრიფინგს გამოეხმაურა, სადაც მან განაცხადა, რომ „ქართული ოცნება“ საარჩევნო სისტემასთან დაკავშირებული ახალი ინიციატივის განხილვას აღარ აპირებს.

„მანიპულაციები და სპექტაკლების დადგმა ხელისუფლების ხასიათის თვისებად იქცა. დღეს პასუხია გასაცემი კითხვაზე: ხალხის სამართლიან აღშფოთებას რას ეუბნება „ქართული ოცნება“? კრიზისიდან გამოსვლაზე ფიქრობს თუ მას აქვს განსაზღვრული შემდეგი მზაკვრული ნაბიჯი. რომ პროპორციული არჩევნების მოთხოვნა გაწიოს გვერდზე, თავად ილაპარაკოს, რომ ჩვენ ამაზე არ წამოვალთ. შეუწყოს ხელი ოპოზიციის რადიკალიზაციას, მოსახლეობის კიდევ უფრო გადარევას, პროპორციული არჩევნების გაწევას გვერდზე და ამ არეულობის ფონზე არსებული სისტემით ვადამდელი არჩევნების ჩატარებას. არ გამოვრიცხავ, რომ ოპოზიციის მხარეს, ამავე მოდელს ჰყავდეს მხარდამჭერები. ამიტომ ოპოზიციონერ კოლეგებს მივმართავ, არ უნდა წამოეგონ ხელისუფლების ხაფანგზე და არავითარ შემთხვევაში არ უნდა მოვხსნათ პროპორციული არჩევნების მოთხოვნა“, - განაცხადა დავით უსუფაშვილმა. 

მისი თქმით, ყველაფერი დანარჩენი არის ინსტრუმენტი პროპორციული არჩევნების მისაღწევად:

„ჩემი დღევანდელი საუბარიც, აქციის მონაწილეთა მსვლელობაც, რომლის სტრატეგიასა და გეგმებში არ არის ერთიანი და აზრი და ვერც იქნება 37 პოლიტიკურ სუბიექტს შორის. მაგრამ ამ ხალხის აღშფოთებას აქვს ჩემი სრული მხარდაჭერა“, - განაცხადა დავით უსუფაშვილმა.

„დღეს კალაძემ გამოაცხადა, რომ თურმე მე წინა საკონსტიტუციო კომისიაში თითი თითზე არ დამიდია ამ საქმის მოსაგვარებლად. მართალია, რომ თითი თითზე არ დამიდია, რადგან თითი თითზე რომ მქონოდა დადებული, ვერაფერს გავაკეთებდი, ამ თითებში ხან კალამი მეჭირა და ხან კომპიუტერზე ვაწკაპუნებდი, რადგან შექმნილიყო ეს 90 გვერდიანი დოკუმენტი, რომელიც ახლა ხელში მიჭირავს და, რომელშიც 90 სიტყვა არ არის შეტანილი მისი დღევანდელი თანაგუნდელების მხრიდან. ამ დოკუმენტში წერია სწორედ პროპორციული არჩევნების თაობაზე. აქვე მაქვს მტკიცებულება, რომ ეს დოკუმენტი ელექტრონული ფოსტით მაქვს გაგზავნილი ფრაქციებისთვის თხოვნით, რომ აგერ არის წინადადებები და იქნებ რამე გვითხრათ ხმამაღლა, მითხრათ მხარს უჭერთ თუ არ უჭერთ“, – განაცხადა დავით უსუფაშვილმა.

მისი თქმით, ამ წინადადებებზე არანაირი პასუხი არ მიუღია.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.

პროპორციულზე უარის თქმის გამო, 17 ნოემბერს თბილისსა და რეგიონებში აქციები გაიმართა, თბილისში ოპოზიციის წარმომადგენლემბა და აქციის მონაწილეებმა პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. დღესვე აქცია გამართა „პატრიოტთა ალიანსმაც“.