აპატურაი ვაჟა გაფრინდაშვილის გათავისუფლებაზე: ნატოს წევრები და ევროკავშირი ამ პროცესში ჩართულები არიან

საქართველოს მოქალაქის დაკავებასთან დაკავშირებულ ყველა დეტალს მე პირადად ვეცნობი და ვაკვირდები. მინდა დარწმუნებულები იყოთ, რომ ნატო ინფორმირებულია და ორგანიზაციას აქვს სრულყოფილი ცნობები ამ საკითხზე. ჩვენი პოზიცია არის ნათელი- ამის შესახებ „ქრონიკასთან“ ინტერვიუში, ოკუპანტების მიერ ექიმ ვაჟა გაფრინდაშვილის დაკავებასთან დაკავშირებით, სამხრეთ კავკასიასა და ცენტრალურ აზიაში ნატო-ს სპეციალურმა წარმომადგენელმა, ჯეიმს აპატურაიმ განაცხადა.

მისი თქმით, ეს არის კიდევ ერთი მაგალითი იმისა, თუ რა გააკეთა რუსეთმა და ამ რეჟიმებთან ერთად დღემდე როგორ აგრძელებს მოქმედებას.

„ჩვენ ვაკეთებთ განცხადებებს ტერიტორიული მთლიანობის მხარდაჭერისა და არაღიარების პოლიტიკის შესახებ. რაც მოხდა, ეს ეხება ინდივიდულურ პირს და ასახავს რუსეთის ქმედებების მძიმე შედეგებს. ვიმეორებ, რომ ალიანსის წევრებს აქვთ ინფორმაცია. ყველამ იცის რაც ხდება. ორგანიზაციის ინდივიდუალური წევრი სახელმწიფოები და ევროკავშირი არიან ჩართული პროცესში. მათ აქვთ საქართველოში საელჩოები და მათთან გვაქვს მჭიდრო კონტაქტი. ძალიან დიდ ყურადღებას ვაქცევთ მომხდარს. რა თქმა უნდა, ჩვენ ძალიან შეშფოთებულები ვართ და გვაქვს იმედი, რომ რაც შეიძლება სწრაფად მოხდება საქართველოს მოქალაქის გათავისუფლება"- განაცხადა აპატურაიმ.

მანამდე ცნობილი გახდა, რომ ცხინვალმა „წითელი ჯვრის კომიტეტს“ ვაჟა გაფრინდაშვილის მონახულების პირობა მისცა. დღეს ვაჟა გაფრინდაშვილის მხარდასაჭერად „თეთრი ხალათების აქცია“ გაიმართა.

ქართველი ექიმი ცხინვალის საოკუპაციო რეჟიმმა ერთი კვირის წინ დააკავა, 15 ნოემბერს მას ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის დარღვევას ედავებიან. დაკავებულის კოლეგების ინფორმაციით, ოკუპანტები და ოსი სეპარატისტები ექიმ ვაჟა გაფრინდაშვილისაგან ერთადერთ რამეს ითხოვენ: აღიაროს საზღვრის გადაკვეთა, რაზეც ის კატეგორიულ უარს აცხადებს.

16 ნოემბერს, აშშ-ის საელჩომ ვაჟა გაფრინდაშვილის დაუყოვნებლივ გათავისუფლება მოითხოვა.

ექიმის დაკავების საკითხს განცხადებები მოჰყვა საგარეო საქმეთა და ჯანდაცვის სამინისტროებში. პარლამენტის თავმჯდომარემ, არჩილ თალაკვაძემ განაცხადა, რომ ექიმის დაპატიმრებით საოკუპაციო რეჟიმი ადამიანურ ღირებულებებს კიდევ ერთხელ გაემიჯნა.

ფაქტს გამოეხმაურა სახალხო დამცველიც. პრეზიდენტმა ზურაბიშვილმა კი საერთაშორისო ორგანიზაციებს მიმართა.