უცხოელი ანალიტიკოსები თბილისში განვითარებულ მოვლენებს ეხმაურებიან

უცხოელი ანალიტიკოსები თბილისში განვითარებულ მოვლენებზე კომენტარებს Twitter-ზე ავრცელებენ. 

კარნეგის ფონდის ანალიტიკოსი თომას დე ვაალი წერს, რომ რუსთაველის გამზირზე განვითარებული მოვლენების შემდეგ ვითარების პროგნოზირება რთულია. 

„რუსთაველის გამზირზე პოლიციამ პროტესტის მონაწილეები დაშალა. ხალხი გაბრაზებულია, რომ მომავალი არჩევნების წინ, მთავრობამ საარჩევნო სისტემის შესახებ დაპირება უკან წაიღო. ახლა ვითარება არაპროგნოზირებადია. ყოველ შემთხვევაში, საქართველოში თავისუფალი მედია კვლავ არსებობს“, - წერს დე ვაალი.   

Heritage Foundation-ის მკვლევარი დემოკრატიის განვითარების რთულ პროცესზე ამახვილებს ყურადღებას. 

„ყოველთვის ვამბობდი, რომ დემოკრატიის და მმართველობის განვითარება ხანგრძლივი პროცესი იქნებოდა. ვგულისხმობ როგორც საქართველოს, ასევე ყველა დემოკრატიას. ვცდილობ, შიდაპოლიტიკაზე კომენტარი არ გავაკეთო, თუმცა როგორც ჩანს, ეს მერყევი პროცესი იქნება“, - წერს ლუკ კოფი.  

მის მსგავსად პენ ბაიდენის სახელობის დემოკრატიისა და გლობალური ჩართულობის ცენტრის დირექტორმა, მაიკ კარპენტერმაც იმ დროს გამოაქვეყნა პოსტი, ვიდრე ვითარება აქციის დაშლამდე მივიდოდა. 

„პრაღა, თბილისი, ბრატისლავა, ბუდაპეშტი, ბუქარესტი, სკოპიე კიევი და ა.შ. მილიონობით მშვიდობიანი მომიტინგე ამ დედაქალაქებში შეიკრიბა საკუთარ თავზე მორგებული ძალაუფლების მქონე ოლიგარქებისა და კორუფციის წინააღმდეგ. ეს გახდა გლობალური ბრძოლა“. 

რუსთაველის გამზირსა და პარლამენტის მიმდებარე ქუჩებზე საავტომობილო მოძრაობა უკვე აღდგენილია.

მანამდე სპეცრაზმმა რუსთაველზე საავტომობილო გზა აქციის მონაწილეებისა და კარვებისგან გაწმინდა. მანამდე სპეცრაზმმა რამდენჯერმე გამოიყენა წყლის ჭავლი. 

აქციის მონაწილეები შინაგან საქმეთა სამინისტრომ და თბილისის მერიის შესაბამისმა უწყებებმა აქციის დაშლამდე რამდენჯერმე გააფრთხილეს.

დღეს დილით პარლამენტში დეპუტატები არ შეუშვეს. რუსთაველის გამზირი მეორე დღეა აქციის გამო გადაკეტილია.

17 ნოემბერს, ღამე აქციის მონაწილეებმა და ოპოზიციის წარმომადგენლებმა პარლამენტის შესასვლელები ტომრებით ჩაკეტეს, მანამდე კი პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. პარალელურად აქცია გამართა „პატრიოტთა ალიანსმაც“.

გაერთიანებული ოპოზიციის მოთხოვნებია: „ვადამდელი პროპორციული არჩევნები, მთავრობის გადადგომა და სამოქალაქო საზოგადოებით დაკომპლექტებული ცესკო“. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.