თბილისში მირკოავტობუსები ისევ იმოძრავებს თუმცა მერია მათ განაახლებს

დედაქალაქის მერი მიკორავტობუსების განახლებას გეგმავს. კახა კალაძემ ვიცემერს ირაკლი ხმალაძეს დავალება უკვე მისცა. მისი განცხადებით, მაქსიმუმ 2 კვირაში კომპანიასთან მჭიდრო კომუნიკაციით სქემა უნდა დალაგდეს, რათა 2020 წლიდან დაიწყოს მიკროავტობუსების ეტაპობრივი ჩანაცვლება. ამის შესახებ თბილისის მერმა დედაქალაქის მთავრობის სხდომაზე განაცხადა. 

"2 წელია, რაც თბილისის მერიაში ვართ მოსულები და დედაქალაქის სატრანსპორტო სისტემისა და საზოგადოებრივი ტრანსპორტის მოსაწესრიგებლად გადავდგით უმნიშვნელოვანესი ნაბიჯები...

ერთადერთი თემა, რასაც აქამდე არ შევხებივართ, არის მიკროავტობუსები.

ყოველი ჩვენი აქტივობის პარალელურად, რასაც ამ მიმართულებით ვატარებთ, უცვლელი რჩება მოსახლეობის მოთხოვნა - შეიცვალოს ყვითელი მიკროავტობუსები. ხშირად სოციალურ ქსელშიც ვრცელდება ვიდეოები, სადაც ჩანს, როგორ ბოლავს ეს ყვითელი მიკროავტობუსები.

ბოლო პერიოდში, რაც დავიწყეთ ახალი ავტობუსების შემოყვანა, დაიკლო მიკროავტობუსების მოხმარების მაჩვენებელმა და გაიზარდა ავტობუსების მოხმარება. რა თქმა უნდა, ხალხს ურჩევნია ახალი, კომფორტული ავტობუსებით მგზავრობა.

აქამდე ჩვენი პოზიცია მიკროავტობუსებთან დაკავშირებით არ დაგვიფიქსირებია", - განაცხადა კახა კალაძემ და ამის მიზეზიც განმარტა. მისი თქმით, კომპანია „სისტრა“ საზოგადოებრივი ტრანსპორტის რეფორმის ანალიზს აკეთებდა და მერიისთვის გარკვეული პერიოდი საერთოდ უცნობი იყო მიკროავტობუსებს ექნებოდა თუ არა ადგილი საზოგადოებრივი ტრანსპორტის შემადგენლობაში.

"როგორც იცით, კვლევა ჩაბარებულია, ანალიზიც გაკეთებულია. ქალაქის რელიეფის თავისებურებებიდან, ქუჩების მოცულობიდან და გამტარიანობიდან გამომდინარე, ასევე იმის გათვალისწინებით, რომ საზოგადოებას კი არ შეუმცირდეს ტრანსპორტზე ხელმისაწვდომობა, არამედ გავუზარდოთ, მიკროავტობუსების როლი შიდა საუბნო დონეზე მაინც მნიშვნელოვანია.

მიკროავტობუსები დარჩება და იქნება ავტობუსებთან და მეტროსთან დამაკავშირებელი საშუალება - ეს არის ის, რასაც ითვალისწინებს „სისტრას“ მოდელი, თუმცა იცით, რომ მიკროავტობუსები დღეს ცენტრალურ ქუჩებშიც გადაადგილდებიან და მათზე კიდევ რჩება მოთხოვნა, თანაც ისინი მუშაობენ სრულიად გაუმართავ მდგომარეობაში.

დღეს შემიძლია დავაფიქსირო, რომ გვჭირდება მიკროავტობუსები და მომავალშიც დაგვჭირდება. კვლევებით დადასტურებულია ეს საჭიროება. ახლა უკვე საზოგადოების პროტესტს, რომელსაც სამართლიანად გამოხატავს დიდი ხანია მიკროავტობუსებთან დაკავშირებით, სჭირდება რეაგირება და შესაბამისი გეგმა.

მე მესმის, რომ გაიზარდა დოლარის კურსი, ასევე გაიზარდა საწავავის ფასი, კომპანიას აქვს გარკვეული ფინანსური პრობლემები, მაგრამ სწორედ ამიტომ არსებობს თბილისის მერია, რომ მოძებნოს პრობლემის გადაჭრის გზა. მე ამის პირობას ვიძლევი, რომ ამ საკითხს აუცილებლად დავძრავთ.

არ ვაპირებ, რომ კიდევ რამდენიმე წელი ვუყურო, როგორ ემსახურება საზოგადოებას ეს ყვითელი მიკროავტობუსები გაუმართავ მდგომარეობაში. ისინი ტექნიკურად გაუმართავია, საჭიროებს დროულ ჩანაცვლებას. წარმოადგინეთ კონცეფცია, პირობები, როგორ შეიძლება უახლოეს პერიოდში დავიწყოთ მიკროავტობუსების ჩანაცვლება კომპანიასთან მჭიდრო თანამშრომლობის გზით", - განაცხადა კახა კალაძემ.