შესაძლებელია ჩინეთიდან საქართველოში პირდაპირი რეისები შეიზღუდოს

ჩინეთიდან საქართველოს მიმართულებით შესაძლოა პირდაპირი ავიარეისები შეიზღუდოს. ჯანდაცვის მინისტრის მოადგილე თამარ გაბუნია აცხადებს, რომ შესაძლებელია ამის საჭიროება დადგეს და ამასთან, კიდევ უფრო გამკაცრდეს ტრანზიტული ქვეყნებიდან მგზავრების კონტროლი. ამ საკითხებზე ხვალ, 27 იანვარს მსჯელობა გაიმართება. 

ჯანდაცვის მინისტრის თქმით, ჯანდაცვის მსოფლიო ორგანიზაციისგან რეკომენდაციებს დაელოდებიან, თუმცა თითოეულ ქვეყანას ინდივიდუალურად შეუძლია მიიღოს მსგავსი გადაწყვეტილება თუ კი საჭიროებას დაინახავს. 

„პირველი რეკომენდაცია, რასაც ხვალ განვიხილავთ იქნება მოგზაურობის შეზღუდვა, ამის შესახებ რეკომენდაციები უკვე გავრცელდა და ჩვენ ვურჩიეთ მოქალაქეებს, რომ თავი შეიკავონ მოგზაურობისგან ისეთ ქვეყნებში, სადაც რისკი მაღალია. ზოგადად შესაძლებელია დადგეს საჭიროება, რომ ჩინეთიდან პირდაპირი რეისები შეიზღუდოს და კიდევ უფრო გამკაცრდეს ტრანზიტული ქვეყნებიდან მგზავრების კონტროლი“, - განაცხადა თამარ გაბუნიამ. 

ამ დროისთვის ჩინეთის ქალაქ უხანში საქართველოს სამი  მოქალაქე რჩება. ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია. თბილისის აეროპორტში მგზავრებს „კორონავირუსზე“ ამოწმებენ. 

ბოლო მონაცემებით, კორონავირუსით გარდაცვლილია 56 ადამიანი. 39 პაციენტი უკვე გამოჯანმრთელდა, ინფიცირებულთა რიცხვმა კი 1600-ს გადააჭარბა.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. ვირუსი უკვე დაფიქსირდა ჩინეთის გარეთ - ტაილანდში, იაპონიაში, ავსტრალიაში, საფრანგეთში, სამხრეთ კორეასა და აშშ-ში. 

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთის ხელისუფლებამ პეკინში ახალი წლისადმი მიძღვნილი ღონისძიებები გააუქმა.

ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.

ემუქრება თუ არა მსოფლიოს ახალი ეპიდემია, ვრცლად შეგიძლიათ წაიკითხოთ ბმულზე.