მდინარაძემ ბოკუჩავას „მიშას „ტიტუშკა“ და „მონა“, ბოკუჩავამ კი მდინარაძეს „სამარცხვინო“ და „ჭანჭიკი“ უწოდა

პარლამენტში თინა ბოკუჩავასა და მამუკა მდინარაძეს შორის სიტყვიერი დაპირისპირება მოხდა, რა დროსაც ბოკუჩავამ მდინარაძეს „ჭანჭიკი“ და „სამარცხვინო“ უწოდა, მდინარაძემ კი „მიშას „ტიტუშკა“ და „მონა“. 

თინა ბოკუჩავა პარლამენტში მალხაზ მაჩალიკაშვილის შეშვებას ითხოვდა და უმრავლესობის წევრებისგან მოითხოვდა განემარტათ მისთვის, რატომ არ აძლევდნენ მაჩალიკაშვილს პარლამენტში შესვლის უფლებას. 

მამუკა მდინარაძემ თინა ბოკუჩავს უთხრა, რომ მაჩალიკაშვილი პროვოკაციის საფრთხის გამო არ შუეშვეს შენობაში, ეს გადაწყვეტილება კი პარლამენტის თავმჯდომარემ მიიღო. მდინარაძემ ბოკუჩავა მაჩალიკაშვილით სპეკულირებაში დაადანაშაულა: „შენ ხარ მიშას „ტიტუშკა“. თქვენ ხართ პროვოკატორები და უზნეო ხალხი, მიშას მონები“, - უთხრა მდინარაძემ ბოკუჩავს. 

„შენ მანდატს არ იმსახურებ. შენ ხომ არავინ ხარ, ჩვეულებრივი ჭანჭიკი ხარ“, - უპასუხა თინა ბოკუჩავამ მამუკა მდინარაძეს.

დილით პარლამენტთან ხმაური და დაპირისპირება იყო, რა დროსაც მალხაზ მაჩალიკაშვილი შეუძლოდ გახდა. თინა ბოკუჩავა და მალხაზ მაჩალიკაშვილი დღეს პარლამენტში პრესკონფერენციის გამართვას აპირებდნენ. 

28 ნოემბერს თემირლან მაჩალიკაშვილის მიმართ ძალადობით სამსახურებრივი უფლებამოსილების შესაძლო გადამეტების ფაქტზე პროკურატურამ გამოძიება შეწყვიტა.

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 2018 წლის 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ.