მაჩალიკაშვილი პარლამენტში დროებითი საგამოძიებო კომისიის შექმნას ითხოვს

პანკისის ხეობაში სპეცოპერაციისას დაჭრილი და შემდეგ საავადმყოფოში გარდაცვლილი თემირლან მაჩალიკაშვილის მამა პარლამენტში დროებითი საგამოძიებო კომისიის შექმნას ითხოვს. მალხაზ მაჩალიკაშვილმა ბრიფინგი თინა ბოკუჩავასთან და ელენე ხოშტარიასთან ერთად პარლამენტის შესასვლელთან გამართა.

მაჩალიკაშვილის თქმით, ამ კომისიის შექმნაში მას მხარს გაერთიანებული ოპოზიცია, „ევროპული საქართველო“ და „ნაციონალური მოძრაობა“ უჭერენ და იგივე თხოვნით „ქართული ოცნებიდან“ წასულ დეპუტატებსაც მიმართა.

„მინდა, მივმართო თამარ ჩუგოშვილს, თამარ ხულორდავას, დიმიტრი ცქიტიშვილს, ირინა ფრუიძეს, მარიამ ჯაშს, ზვიად ძიძიგურს, ბიძინა გეგიძეს, კობა ნარჩემაშვილს, ლევან კობერიძეს, ლევან გოგუაშვილს, ნინო გოგუაძეს, გიორგი მოსიძეს, გიორგი ბეგაძეს, გედევან ფოფხაძეს, ალექსანდრე ერქვანიას, ზვიად კვაჭანტირაძეს, ეკა ბესელიას, დავით ჭიჭინაძეს, ბექა ნაცვლიშვილსა და ზაზა ხუციშვილს და დიდი იმედი მექნება, რომ ამ დროებითი კომისიის შექნაში მხარს დამიჭერთ" - განაცხადა მაჩალიკაშვილმა.

დილით პარლამენტთან ხმაური და დაპირისპირება იყო, რა დროსაც მალხაზ მაჩალიკაშვილი შეუძლოდ გახდა. თინა ბოკუჩავა და მალხაზ მაჩალიკაშვილი დღეს პარლამენტში პრესკონფერენციის გამართვას აპირებდნენ. 

28 ნოემბერს თემირლან მაჩალიკაშვილის მიმართ ძალადობით სამსახურებრივი უფლებამოსილების შესაძლო გადამეტების ფაქტზე პროკურატურამ გამოძიება შეწყვიტა.

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 2018 წლის 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ.