არჩილ თალაკვაძე: თემირლან მაჩალიკაშვილის საქმეზე საგამოძებო კომისიის შექმნას არ განვიხილავთ

პარლამენტის თავმჯდომარის, არჩილ თალაკვაძის განცხადებით, მალხაზ მაჩალიკაშვილთან ერთად ბრიფინგის გამართვაზე თინა ბოკუჩავას თალაკვაძესთან კომუნიკაცია არ ჰქონია. პარლამენტის თავმჯდომარის შეფასებით, დღეს დაგეგმილი ბრიფინგი „პოლიტიკური, ვიწროპარტიული იყო და ასეთი ბრიფინგების ადგილი პარტიულ ოფისშია“.

„ეს არის სუფთა პოლიტიკური, ვიწროპარტიული ბრიფინგი, რომელზეც ეს პოლიტიკური პარტია, „ნაციონალური მოძრაობა“ ცდილობს კონკრეტული მოქალაქის ინტერესი საკუთარი პოლიტიკური ინტერესისთვის გამოიყენოს. შესაბამისად მე პირად მიმაჩნია, რომ ასეთი ბრიფინგების ადგილი მათი პარტიული ოფისია. ჩვენ მას ამის საშუალებას არ მივცემთ“, - განაცხადა არჩილ თალაკვაძემ.

რაც შეეხება მალხაზ მაჩალიკაშვილის მოთხოვნას, თემირლან მაჩალიკაშვილის საქმეზე პარლამენტში საგამოძიებო კომისიის შექმნასთან დაკავშირებით, თალაკვაძე ამბობს, რომ უმრავლესობა ამ კომისიის შექმნას არ განიხილავს. 

დილით პარლამენტთან ხმაური და დაპირისპირება იყო, რა დროსაც მალხაზ მაჩალიკაშვილი შეუძლოდ გახდა. თინა ბოკუჩავა და მალხაზ მაჩალიკაშვილი დღეს პარლამენტში პრესკონფერენციის გამართვას აპირებდნენ. 

28 ნოემბერს თემირლან მაჩალიკაშვილის მიმართ ძალადობით სამსახურებრივი უფლებამოსილების შესაძლო გადამეტების ფაქტზე პროკურატურამ გამოძიება შეწყვიტა.

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 2018 წლის 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ.