ქეთევან ციხელაშვილმა ოკუპირებულ ტერიტორიებზე შექმნილი ვითარება ჟენევის დისკუსიების თანათავმჯდომარეებთან განიხილა

შერიგებისა და სამოქალაქო თანასწორობის საკითებში სახელმწიფო მინისტრმა, ქეთევან ციხელაშვილმა ოკუპირებულ ტერიტორიებზე შექმნილი ვითარება ჟენევის დისკუსიების თანათავმჯდომარეებთან განიხილა.

ჟურნალისტებთან საუბრისას სახელმწიფო მინისტრი ეთნიკურად ქართველი დირექტორების გათავისუფლების საკითხს შეეხო და აღნიშნა, რომ ეს არ არის ერთეული შემთხვევა, ეს არის პოლიტიკის ნაწილი, რომელიც მშობლიურ ენაზე განათლების მიღებას ეწინააღმდეგება.

რაც შეეხება მასწავლებლებს, მინისტრის თქმით, ესეც ამ დისკრიმინაციული პოლიტიკის გამოვლინებაა და საუბედუროდ, არ არის ახალი იმიტომ, რომ ახალგორში, ისევე როგორც გალის რაიონში სამწუხაროდ, არაერთხელ მომხდარა, რომ მასწავლებლების ეთნიკური ნიშნით ათავისუფლებენ, სხვადასხვა საბაბით.

„ჟენევის საერთაშორისო დისკუსიების ფარგლებში ეს არის ერთ-ერთი ყველაზე მთავარი და მწვავე საკითხი, ჩვენი დიალოგის, საუბრის და მცდელობის ჩვენს პარტნიორებთან ერთად, რომ ეს პროცესი შეჩერდეს და მიეცეს იქ მცხოვრებ მოსახლეობას მშობლიურ ქართულ ენაზე განათლების მიღების შესაძლებლობა, რომელიც არამხოლოდ მათი უფლება და სურვილია, არამედ არის ერთადერთი ენა, რომელზეც საუბრობენ, მასწავლებლები, მშობლები და მოსწავლეები.

გათავისუფლებულ მასწავლებლებს შეიძლება, ასი საბაბი დაუსახელონ და თითიდან გამოწოვილი სხვადასხვა ფაქტორი მოიყვანონ. მაგრამ ფაქტი არის ერთი, ეს ადამიანები მუშაობდნენ ძალიან მძიმე პირობებში, ახერხებდნენ იმას, რომ სკოლაში სასწავლო პროცესი წარმართულიყო.

ამიტომ ჩვენ ვერანაირ ობიექტურ მიზეზებზე ვერ ვისაუბრებთ ამ ქალბატონების, სხვა პედაგოგებისა თუ დირექტორების გათავისუფლების შესახებ. ამას სამწუხაროდ, ერთი საერთო აქვს, ისინი ეთნიკურად ქართველები არიან.

ეს არ არის ერთეული შემთხვევა, ეს არის პოლიტიკის ნაწილი, რომელიც მშობლიურ ენაზე განათლების მიღებას ეწინააღმდეგება. ამ თემებზე, ამ დღეებში ჟენევის თანათავმჯდომარეებთან უკვე მქონდა საუბარი, საკმაოდ დეტალურად განვიხილეთ კონკრეტული ეს შემთხვევა, ისევე როგორც დღეს შექმნილი მძიმე ჰუმანიტარული პირობები, განსაკუთრებით ცხინვალის რეგიონში, თან ზამთარში.

მოგეხსენებათ, რომ მიმოსვლა და გადაადგილება შეზღუდულია როკის გვირაბზე, სადაც არის საქართველო-რუსეთის საზღვრის მონაკვეთი, რომელსაც დღეს ჩვენ ვერ ვაკონტროლებთ.  ეს ადასტურებს კიდევ ერთხელ თუ რამდენად მნიშვნელოვანია ახალგორის მიმართულებით გადაადგილების შესაძლებლობის უზრუნველყოფა”, - განაცხადა ქეთევან ციხელაშვილმა.