HRW-ის წლიურ ანგარიშში საქართველოც მოხვდა

Human Rights Watch-ის წლიური ანგარიში გამოქვეყნდა.  დოკუმენტში საქართველოზეც არის საუბარი. ყურადღება გამახვილებულია საპარლამენტო არჩევნებზე, ფარულ მოსმენებზე, პირადი ცხოვრების ხელშეუხებლობის უფლებაზე, წამებაზე, არაადამიანურ მოპყრობაზე, შერჩევით სამართალსა და კიდევ რამდენიმე მნიშვნელოვან პრობლემაზე.

ევროკავშირთან ასოცირების შეთანხმების გარდა  Human Rights Watch-ის ანგარიშში აქცენტი გაეროს მომხსენებლის ანგარიშის იმ ნაწილზეა გაკეთებული, რომელიც საქართველოში ფემიციდის პრობლემას ეხება.ანგარიშის მიხედვით, საქართველოში სახელმწიფო უშიშროების სამსახურების თავისუფალმა წვდომამ სატელეკომუნიკაციო ოპერატორების ქსელებზე რისკის ქვეშ დააყენა პირადი ცხოვრების ხელშეუხებლობის უფლება. 

ასევე აღნიშნულია, რომ სამართალდამცველების მიერ ჩადენილი დანაშაულისთვის პასუხისმგებლობის დადგომის ნაკლებობა არსებობს. 
ანგარიშის ავტორების აზრით, სხვა სფეროები, რომლებიც შეშფოთებას იწვევს საქართველოში მოიცავს მედია თავისუფლებას და ლგბტ ადამიანების უფლებებს.

Human Rights Watch-ის ანგარიშს გამოეხმაურა ევროკავშირის ელჩი საქართველოში იანოშ ჰერმანი. „ჩვენ ვაკვირდებით, ვსწავლობთ სხვადასხვა ანგარიშებს, განსაკუთრებით არასამთავრობო ორგანიზაციების ანგარიშებს. თუმცა, ჩვენ ჩვენი აზრი გაგვაჩნია საქართველოში არსებულ პროგრესზე ასოცირების ხელშეკრულების იმპლემენტაციის კონტექსტში. ცოტა ხნის წინ ჩვენ გამოვაქვეყნეთ ჩვენი ანგარიში, რომელშიც მოცემულია ევროკავშირის მოსაზრება“, - განაცხადა იანოშ ჰერმანმა.