რა წერია აშშ-ის სახელმწიფო დეპარტამენტის ახალ ანგარიშში საქართველოზე. მთავარი

აშშ-ს სახელმწიფო დეპარტამენტმა ადამიანის უფლებების 2018 წლის ანგარიში გამოაქვეყნა, რომელიც სხვა ქვეყნებთან ერთად ცალკე საქართველოს ეძღვნება. 

საქართველოს ნაწილში ანგარიშში არაერთ საკითხზეა საუბარი. მათ შორის საპრეზიდენტო არჩევნებზე, რუსეთის მიერ ოკუპირებულ ტერიტორიებზე არსებულ ვითარებაზე, თემირლან მაჩალიკაშვილის საქმეზე, ოთხოზორია-ტატუნაშვილის სიაზე. აგრეთვე აზერბაიჯანელი ჟურნალისტის აფგან მუხტარლის საქმეზე. 

ანგარიშის თანახმად, ევროპაში ეუთო-ს დამკვირვებლებმა საპრეზიდენტო არჩევნების პირველი ტური, როგორც კონკურენტუნარიანი და პროფესიულად ორგანიზებულა აღწერეს, თუმცა შეშფოთება გამოთქვეს ისეთ საკითხებზე, როგორიც არის თამაშის არათანაბარი პირობები და ამომრჩევლის დაშინება.

დოკუმენტის ავტორები აღნიშნავენ, რომ „ხელისუფლებამ ნაბიჯები გადადგა ადამიანის უფლებათა დარღვევის ბრალდებების გამოძიების კუთხით, თუმცა ხარვეზები მაინც დარჩა“. 

დოკუმენტის შესავალში ასევე წერია, რომ რუსეთის მიერ ოკუპირებული რეგიონების აფხაზეთისა და სამხრეთ ოსეთის დე ფაქტო მთავრობებმა ეთნიკურად ქართველების უფლებები შეზღუდეს.

როგორც დოკუმენტში წერია, დე ფაქტო სამხრეთ ოსეთის ხელისუფლებამ უკან დაბრუნების ნება არ დართო 2008 წლის კონფლიქტის გამო განდევნილ ეთნიკურად ქართველებს და საერთაშორისო ორგანიზაციებს წვდომა არ აქვთ სამხრეთ ოსეთში, რათა ჰუმანიტარული დახმარება უზრუნველყონ.

ანგარიშში ასევე საუბარია ბადრი პატარკაციშვილის მკვლელობის მომზადების საქმეზე. დოკუმენტში წერია, რომ 17 ოქტომბერს, საქართველოს მთავარმა პროკურატურამ ამ საქმეზე ფარული ჩანაწერები გაავრცელა. ჩანაწერების მიხედვით, კუდის ყოფილი მაღალჩინოსნები ბადრი პატარკაციშვილის მკვლელობას გეგმავენ, მათ შორის, ცდილობენ ბიზნესმენის დაცვის წევრის გადაბირებას.

ანგარიშში ასევე საუბარია საქართველოს ციხეებში არსებულ ვითარებაზე და სასამართლო სისტემაზე. „მიუხედავად იმისა, რომ კონსტიტუცია და კანონმდებლობა დამოუკიდებელ სასამართლო სისტემას ითვალისწინებს, ადგილი ჰქონდა სასამართლო დამოუკიდებლობაში და მიუკერძოებლობაში ჩარევას", - ნათქვამია დოკუმენტში.

ანგარიშში ასევე საუბარია მედიაგარემოზე. როგორც დოკუმენტში აღნიშნული, საქართველოში დამოუკიდებელი მედია ძალიან აქტიური იყო და განსხვავებულ შეხევდულებებს გამოთქვამდა. „17 ოქტომბერს 17 ოქტომბერს დამოუკიდებელმა ტელევიზიამ „იბერია“ მაუწყებლობა შეაჩერა. არხის მფლობელმა განაცხადა, რომ ფინანსური პრობლემები ხელისუფლების მხრიდან ზეწოლას უკავშირდება. „იბერიის“ დახურვამ და 2017 წელს სამი ტელევიზიის შერწყმამ შეამცირა მედიაპლურალიზმი და გაზარდა მმართველი პარტიის სასარგებლოდ მედიასაშუალებების კონცენტრაცია. არასამთავრობო ორგანიზაციებმა გააკრიტიკეს საზოგადოებრივი მაუწყებლისა და საქართველოს კომუნიკაციების ეროვნული კომისიის ხელმძღვანელებსა და მმართველ პარტიას შორის ახლო ურთიერთობა“, - ნათქვამია ანგარიშში.

დოკუმენტში ასევე საუბარია ყოფილი პრეიდენტის გიორგი მარგველაშვილის ვეტოზე, რომელიც მან მაუწყებლობის შესახებ კანონპროექტს დაადო.

მედიაზე საუბრისას ანგარიშში აღნიშნულია რუსთავი2-ის საქმეც. დოკუმენტში წერია, რომ 2017 წლის მარტში სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა, რომელიც ტელევიზიის ქიბარ ხალვაშისთვის გადაცემას ითვალისწინებდა.