ირმა ინაშვილი: დღეს პოლიტიკური სპექტრის ამოცანა კონსესუსი და პოლიტიკური საქმიამობის გაგრძელება უნდა იყოს

100/50-ზე მიუღებელია. მისაღებია 135/15-ზე, 130/20-ზე, 125/25-ზე. მიუღებელი იყო 110/40-ზე, მაგრამ დღეს ხელისუფლება ლაპარაკობს, რომ ექნება მყარი ბერკეტები, - ამის შესახებ „პატრიოტთა ალიანსის“ ლიდერმა ირმა ინაშვილმა განაცხადა, რომელმაც მოლაპარაკებების მიმდინარეობის პროცესსა და ხელისუფლების შეთავაზებაზე კომენტარი გააკეთა.

ირმა ინაშვილის თქმით, უმრავლესობის ერთ-ერთი შეთავაზებაა 110/40-ზე, რომლის გარშემოც მიდის მსჯელობა.

„ჩვენი პოლიტიკური გუნდის მოთხოვნა იყო პროპორცია 135/15-ზე. ჩვენ ამ შემთხვევაში მაჟოროტარების განაწილების სამხარეო პრინციპს ვითვალისწინებდით. ყველა მხარე იქნებოდა მოცული. ამასთან, თბილისი სამი მაჟორიტარით იქნებოდა წარმოდგენილი. ასევე, ჩვენი მოთხოვნა იყო და დღესაც რჩება, სავალდებულო მონაწილეობა არჩევნებში. მრავალი წელია ჩვენ ამაზე ვსაუბრობთ. ასევე, ცვლილებები საარჩევნო კოდექსში და ადმინისტრაციული რესურსების გამოყენება გახდეს სისხლის სამართლის კატეგორიის დანაშაული. დღეს ხელისუფლება და უმრავლესობა საუბრობს სხვადასხვა წინადადებაზე. ერთ-ერთი რაც გამოიკვეთა, არის 110/40-ზე, რომლის გარშემოც მიდის მსჯელობა. ჩვენც ვმსჯელობთ ამ საკითხებზე, მაგრამ აუცილებლად უნდა იყოს ეს ჩამკეტი მექანიზმები. კარგი იქნება, თუ ნაბეჭდი სახით გავეცნობით უმრავლესობის მიერ წარმოდგენილ პროექტს, რათა გვქონდეს ზუსტი ხედვა, რა შემოთავაზებაზეა საუბარი; გავაკეთოთ ანალიზი და ჩვენი შენიშვნებიც გავუზიაროთ. დღეს პოლიტიკური სპექტრის ამოცანა უნდა იყოს შეთანხმება, კონსესუსი და პოლიტიკური საქმიამობის გაგრძელება“, - განაცხადა ინაშვილმა.

მისივე თქმით, იგი შექმნილი სიტუაციიდან გამოსავალს უმრავლესობის მხრიდან გონივრული გადაწყვეტილების მიღებაში ხედავს.

„უმრავლესობის წინადადება უნდა იყოს გარანტირებული და ამ გარანტიებით იყოს დატვირთული ეს კანონპროექტი, რომლიც იქნება შემოთავაზებული. მაქსიმალური მოცულობა უნდა ჰქონდეს პროპორციულ ნაწილს და შეზღუდული უნდა იყოს მაჟორიტარების ნაწილი. 100/50-ზე მიუღებელია. მისაღებია 135/15-ზე, 130/20-ზე, 125/25-ზე. მიუღებელი იყო 110/40-ზე, მაგრამ დღეს ხელისუფლება ლაპარაკობს, რომ ექნება მყარი ბერკეტები, ჩაკეტოს სისტემა ისე რომ არ მისცეს გასაქანი მაჟორიტარულ ნაწილს და საკუთარი თავიც შეიზღუდოს. ეს გარანტიები და ეს მექანიზმები უნდა ვნახო ნაბეჭდი სახით და არა სიტყვიერი მოლაპარაკებების ფარგლებში. ბარიერს რაც შეეხება, ჩვენ ვითხოვთ იყოს ბარიერი 3%-იანი და ბლოკებისთვის 5%-იანი. ამ პროცენტების გადალახვა თუ არ შეგიძლია, პარლამენტში რა გინდა?“, - განაცხადა ირმა ინაშვილმა.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდმა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.