ბადრი ჯაფარიძე: ქვეყანაში სტაბილურობის შენარჩუნება იქნება გარანტი, რათა სამართლიანი საარჩევნო სისტემა და სამართლიანი საარჩევნო გარემო გვქონდეს

ოპოზიციური პარტიები განწყობილი არიან, რომ ქვეყანაში სტაბილურობა შენარჩუნდეს. სტაბილურობის შენარჩუნება იქნება გარანტი, რათა სამართლიანი საარჩევნო სისტემა და სამართლიანი საარჩევნო გარემო გვქონდეს, - ამის შესახებ პოლიტიკური გაერთიანება „ლელო საქართველოსთვის“ ერთ-ერთმა ლიდერმა, ბადრი ჯაფარიძემ განაცხადა, რომელმაც კომენტარი გააკეთა საარჩევნო სისტემაში განსახორციელებელ ცვლილებებზე და ამ მიზნით არსებულ მოლაპარაკების პროცესზე.

„ოპოზიციური პარტიების საკონსულტაციო ფორმატი, რომელიც არსებობს, თანასწორუფლებიანია. ყველა იმ განსხვავების მიუხედავად, რომელიც არსებობს პოლიტიკურ პარტიებს შორის. ჩვენ შევძელით, ერთ ძირითად პრინციპზე შევჯერებულიყავით. ამ ქვეყანას სჭირდება სამართლიანი საარჩევნო სისტემა, ამ ქვეყანას არჩევნებისათვის სჭირდება სამართლიანი გარემო. ამისთვის საჭიროა ისეთ სისტემაზე შეთანხმება, რომელიც ერთხელ და სამუდამოდ მისცემს საზოგადოებას საშუალებას, ზუსტად აისახოს ის განწყობები, რომელიც ქართულ საზოგადოებაშია. ამასთან ერთად, უნდა შეწყდეს პოლიტიკური დევნა და პოლიტიკური პატიმრები უნდა გათავისუფლდნენ. მიგვაჩნია, რომ ამ მხრივ საერთაშორისო პარტნიორების ჩართულობა მნიშვნელოვანია“, - განაცხადა ჯაფარიძემ.

ოპოზიციური გაერთიანების წარმომადგენელმა ასევე ისაუბრა, თუ რა მოლოდინი აქვს მოლაპარაკების პროცესთან დაკავშირებით.

„მოლოდინი მაქვს პოზიტიური. ვფიქრობ, ამას არ სჭირდება ერთი კვირა - იმ განსხვავების დაძლევას, რომელიც არსებობს. ამისთვის ხელისუფლების მხრიდან კეთილი ნებაა საჭირო. ოპოზიციური პარტიები განწყობილნი არიან ისე, რომ ქვეყანაში სტაბილურობა შენარჩუნდეს. სტაბილურობის შენარჩუნება იქნება გარანტია, რათა ჩვენ გვქონდეს სამართლიანი საარჩევნო სისტემა და სამართლიანი საარჩევნო გარემო“, - განაცხადა ჯაფარიძემ.

მისივე თქმით, ოპტიმიზმის საფუძველს ამ პროცესში საერთაშორისო პარტნიორების ძალიან აქტიური ჩართულობა აძლევს.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდმა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.