ლინოს-ალექსანდრე სიცილიანოსი და ანდერს კნაპე ევროპის საბჭოში საქართველოს თავმჯდომარეობას დადებითად აფასებენ

ადამიანის უფლებათა ევროპული სასამართლოს თავმჯდომარე ლინოს-ალექსანდრე სიცილიანოსი და ევროპის საბჭოს ადგილობრივ და რეგიონულ ხელისუფალთა კონგრესის პრეზიდენტი ანდერს კნაპე ევროპის საბჭოში საქართველოს თავმჯდომარეობას დადებითად აფასებენ.

ადამიანის უფლებათა ევროპული სასამართლოს თავმჯდომარის განცხადებით, ორგანიზაცია დადებითად აფასებს საქართველოს თავმჯდომარეობის ინოვაციურ პრიორიტეტს გარემოს დაცვა და ადამიანის უფლებები. კონგრესის პრეზიდენტის განცხადებით, საქართველომ მიუხედავად კოვიდმაპდემიისა შეძლო თავმჯდომარეობის ღირსეულად წარმართვა.

„ძვირფასო კოლეგებო და მეგობრებო საქართველოდან, ჩემთვის ძალიან სასიხარულოა, რომ მოგმართავთ დღეს, როდესაც სრულდება საქართველოს მიერ ევროპის საბჭოს თავმჯდომარეობის ვადა. ჩემთვის, როგორც ევროპის საბჭოს კონგრესის პრეზიდენტისთვის, ძალიან სასიამოვნო იყო თქვენთან ერთად მუშაობა თქვენი თავმჯდომარეობის პერიოდში. მე ძალიან კარგად მესმის, თუ რამდენად რთული იყო თქვენთვის მუშაობა COVID-19-ის გავრცელებიდან გამომდინარე შექმნილ კრიზისულ პირობებში. თუმცა, თქვენ შეძელით ძალიან კარგად შეგესრულებინათ თქვენი სამუშაო. ბედნიერი ვარ, რომ თებერვლის თვეში მომეცა შესაძლებლობა ოფიციალური ვიზიტით ვწვეოდი საქართველოს და შევხვედროდი ახალგაზრდებს, ევროპისა და საქართველოს მომავლის განსახილველად. ვიზიტის დროს, ასევე შევხვდი მინისტრებს, ვიცე-პრემიერს, თბილისის მერს და საქართველოში ადგილობრივ და რეგიონულ ხელისუფალთა ასოციაციის ხელმძღვანელობას.

ეს ვიზიტი ჩემთვის იყო ძალიან მნიშვნელოვანი იმის გასაგებად, თუ რა სირთულეების წინაშე დგას საქართველო ქვეყნის გარშემო შექმნილი ვითარებიდან გამომდინარე. მოხარული ვარ, რომ თქვენ მიყვებით დეცენტრალიზაციის პროცესს, ითვალისწინებთ კონგრესის რეკომენდაციებს და თვალყურს ადევნებთ კონგრესის მიერ თქვენ ქვეყანაში გასული წლების მანძილზე განხორციელებულ მონიტორინგისა და პოსტ-მონიტორინგის აქტივობებს. მე თქვენი მადლიერი ვარ ამისთვის.

ასევე მადლიერი ვარ იმ სამუშაოსთვის, რომელსაც საქართველოს დელეგაცია ახორციელებს კონგრესის სამუშაოში ჩართვისა და საკუთარი წვლილის შეტანის მიმართულებით. ვიმედოვნებ, რომ უახლოეს მომავალში მომეცემა საშუალება დავბრუნდე თქვენს მშვენიერ ქვეყანაში, რომელიც გამორჩეულია სტუმართმოყვარეობითა და კეთილგანწყობილი ადამიანებით. ველი თქვენთან მუშაობის შესაძლებლობას და საქართველოს წარმატებას ვუსურვებ!“ - აცხადებს ანდერს კნაპე.

რაც შეეხება ადამიანის უფლებათა ევროპული სასამართლოს თავმჯდომარეს, ლინოს-ალექსანდრე სიცილიანოსი მადლობას უხდის საქართველოს ევროსაბჭოს მინისტრთა კომიტეტის თავმჯდომარეობისთვის.

„ასევე მსურს მადლობა გადავუხადო პირადად მინისტრთა კომიტეტის თავმჯდომარეს, დავით ზალკალიანს და მუდმივ წარმომადგენელს, ირაკლი გივიაშვილს ამ რთულ პერიოდში მინისტრთა კომიტეტის ფუნქციონირებაში შეტანილი წვლილისთვის. ჩვენთვის, როგორც ადამიანის უფლებათა ევროპული სასამართლოსთვის, მინისტრთა კომიტეტი კონვენციის სისტემის უტყუარობისა და სიცოცხლისუნარიანობის გარანტია. ეს არის ძალიან მნიშვნელოვანი ორგანო. ამასთან ერთად, ჩვენ ძალიან კეთილგანწყობილნი ვართ თქვენ მიერ წარმოდგენილი ინიციატივის მიმართ, რომელიც ეხება გარემოს დაცვას. მე პირადად მივიღე მონაწილეობა როგორც 27 თებერვალს თქვენ მიერ ორგანიზებულ დიდ კონფერენციაში, რომელიც მიეძღვნა გარემოს დაცვასა და ადამიანის უფლებებს, ასევე ამ კვირაში გამართულ ვიდეო-კონფერენციაში, ბავშვზე ორიენტირებულ მართლმსაჯულებაზე. ეს ძალიან მნიშვნელოვანი საკითხები და ინიციატივებია და მე მინდა ეს მოგილოცოთ. თქვენ ამ ურთულეს პირობებში გააკეთეთ ყველაფერი, რაც შეგეძლოთ.
მადლობა საქართველოს!“ - აცხადებს ადამიანის უფლებათა ევროპული სასამართლოს თავმჯდომარე.