დიმიტრი ცქიტიშვილი: შრომის ინსპექციის კანონი უახლოეს მომავალში შრომის ინსპექციის ძლიერ ინსტიტუტს შექმნის

პარლამენტი ჯანდაცვისა და სოციალურ საკითხთა კომიტეტის სხდომაზე, მესამე მოსმენით განიხილავს შრომის კოდექსში შესატანი ცვლილებების საკითხს. კანონპროექტი გულისხმობს შემდეგი საკითხების მოწესრიგებას: დისკრიმინაციის აკრძალვა; ზეპირი და ვადიანი შრომითი ხელშეკრულება; შრომითი ხელშეკრულების არსებითი პირობები; სტაჟიორის სამართლებრივი სტატუსი; არასრული სამუშაო განაკვეთი; სამუშაო დრო; დასვენების-შესვენების უფლება; ზეგანაკვეთური სამუშაო; ცვლაში მუშაობა; ღამით მუშაობა; ორსულობის და მშობიარობის გამო შვებულება, ბავშვის მოვლის გამო შვებულება, რომელიც ასევე მოიცავს მამების ანაზრაურებადი შვებულების უფლებას.

„განსაზღვრული იქნება კანონის ამოქმედების ვადები. მოგეხსენებათ, პირველი და მეორე მოსმენის პერიოდში გარკვეული შეთანხმებები შედგა მხარეებს შორის და გარკვეული კომპრომისული ვერსია შემუშავდა, თუმცა კანონი თავისი შინაარსით ითვალისწინებს საკმაოდ მნიშვნელოვან, ფუნდამენტურ რეფორმებს და ეს სულისკვეთება არის შენარჩუნებული. რაც მთავარია, ეს არის შრომის ინსპექციის კანონი, რომელიც უახლოეს მომავალში შექმნის შრომის ინსპექციის ძლიერ ინსტიტუტს და გვექნება შესაძლებლობა, დაწერილი კანონები სინამდვილეში იყოს აღსრულებადი. ამას უზრუნველყოფს შრომის ინსპექცია, რომლის გაძლიერებაზეც უკვე დაწყებულია მუშაობა“, - განაცხადა დამოუკიდებელმა დეპუტატმა დიმიტრი ცქიტიშვილმა.