სოზარ სუბარი: გამარჯვება გარდაუვალია, ამაზე მეტყველებს ყველა გამოკითხვა

8 წლის წინ მართლა ისტორიული გამარჯვება მოვიპოვეთ და იმ ემოციის დავიწყება შეუძლებელია. ეს იყო ქართველი ხალხის ნების სრული გამოხატულება, - ამის შესახებ ,,ქართული ოცნება -დემოკრატიული საქართველოს“ სამგორის რაიონის მაჟორიტარი დეპუტატობის კანდიდატმა, სოზარ სუბარმა „დღის ქრონიკაში“ განაცხადა.

მისი თქმით, „ქართული ოცნების“ გამარჯვება გარდაუვალია და ამაზე მეტყველებს ყველა გამოკითხვა.

„8 წლის წინ მოპოვებული გამარჯვების შესახებ საუბრისას რუსთავის მაგალითს ხშირად ვიხსენებ-ხოლმე და მთელ საქართვლოში იგივე ხდებოდა. რუსთავში მაჟორიტარული არჩევნების პირველი ტურისთვის 20-24 ათასი ხმა ყოველთვის საკმარისი იყო, რადგან არჩევნებზე 45-46 ათას ამომრჩეველზე მეტი არასდროს მოდიოდა. „ნაციონალურ მოძრაობას“ გვარებით და სახელებით ჰქონდა დათვლილი ხმები და დაშინებით თუ მოსყიდვით იცოდა, რამდენ ხმას მიიღებდა, მაგრამ ადამიანების ზღვა რაოდენობა რომ მოვიდა არჩევნებზე, იმას წინ ვერავინ დაუდგებოდა და მთელ საქართველოში ერთი და იგივე სურათი იყო. ადამიანები შატილიდან მიდიოდნენ დედოფლისწყაროში, ბათუმიდან - ლაგოდეხში, დმანისიდან - მესტიაში, რომ ხმა მიეცათ. უცხოეთიდან ჩამოფრინდა უამრავი ადამიანი ხმის მისაცემად. ეს მუხტი შესაძლოა კი განელდა, მაგრამ რა ღირებულებებსაც მაშინ დაუჭირა მხარი ქართველმა ხალხმა, დღესაც იმავე ღირებულებებს უჭერს მხარს და სწორედ ამითაა განპირობებული ის რეიტინგები, რაც არსებობს. ეს იყო გამარჯვება ქართველი ხალხის, დემოკრატიის და ეს გამარჯვება გრძელდება. ამიტომაც არის, რომ საქართველოს საუკეთესო მაჩვენებელი აქვს საერთაშორისო რეიტინგებში ღია მმართველობის ინდექსში, ერთ-ერთი ყველაზე დაბალი მაჩვენებელი აქვს კორუფციაში მსოფლიოს წამყვან ქვეყნებს შორისაც კი, ყველაზე ღიაა ეკონომიკა, ყველაზე ადვილი ბიზნესის დაწყება და ეს ის კრიტერიუმებია, რომელიც ქვეყანას წარმოაჩენს ძალიან წარმატებულ და მდგრად, დემოკრატიულ ქვეყანად. ამის მაჩვენებელია ისიც, რომ პირველად მესამე ვადით, ხელისუფლებაში მყოფი ძალა ემზადება არჩევნებში გამარჯვებისთვის. გამარჯვება რომ გარდაუვალია, ამაზე მეტყველებს ყველა გამოკითხვა, როგორც ჩვენი, ისე ჩვენი ოპონენტებისა და ასევე ნეიტრალური გამოკითხვები“, - განაცხადა სოზარ სუბარმა.