არჩილ თალაკვაძე: დავით გარეჯი პარტიული დღის წესრიგის მიღმაა და საკითხს ამ კონტექსტში არ და ვერ განვიხილავთ

„დავით გარეჯთან დაკავშირებით სიმართლეა ის, რომ ეს ეროვნული მნიშვნელობის სახელმწიფოებრივი საკითხია“, - ეს განცხადება მედიასთან საქართველოს პარლამენტის თავმჯდომარე არჩილ თალაკვაძემ, მცხეთაში გააკეთა.

მისი თქმით, ხელისუფლება დავით გარეჯს უყურებს, როგორც ეროვნული მნიშვნელობის საკითხს. „დავით გარეჯი, ყოველთვის გარკვეული პარტიული დღის წესრიგის მიღმაა და ამას რომელიმე პარტიის გადმოსახედიდან, პარტიულ დღის წესრიგში არ და ვერ განვიხილავთ.

ჩვენ როგორც ხელისუფლება ვთვლით, რომ დავთ გარეჯის საკითხი აერთიანებს ყველა ჩვენს მოქალაქეს. ჩვენ გავაკეთებთ ყველაფერს კონსტიტუციის და კანონმდებლობის ფარგლებში, რომ ჩვენი კულტურული მემკვიდრეობა იყოს დაცული და გავარკვიოთ, ის სადავო საკითხები ჩვენს სტრატეგიულ პარტნიორთან და მეგობართან აზერბაიჯანთან, რომელიც წლების განმავლობაში იდგა დღის წესრიგში. თუ ამას დაეხმარება აუთენტური რუკები, რომლებიც ბოლო პერიოდში იქნა მოწოდებული და აღმოჩენილი, მათ შორის გამოძიების მხრიდან, ჩვენ ამას გამოვიყენებთ მოლაპარაკების შემდეგ ეტაპზე.

ჩვენი ამოცანაა უზრუნველყოთ სასაზღვრო ხაზების შეთანხმება ისე, რომ დავით გარეჯთან დაკავშირებული დავა მოწესრიგდეს და აღმოიფხვრას ჩვენი სახელმწიფოს და ხალხის ინტერესების სასარგებლოდ“, - განაცხადა თალაკვაძემ.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.