დავით მაღრაძე „ნაციონალურ მოძრაობაზე“: გორი და თბილისის ტრასა რომ დარჩენოდათ მარტო, გორს დარუბანდს დაარქმევდნენ, თბილისს ნიკოფსიას და იტყოდნენ, აი, შევქმენით ქართული იმპერია ნიკოფსიიდან დარუბანდამდე!

ეს ის ხალხია, მთელი საქართველოს ტერიტორია და მიწა-წყალი რომ დაეკარგათ და გორი და თბილისის ტრასა რომ დარჩენოდათ მარტო, გორს დარუბანდს დაარქმევდნენ, თბილისს ნიკოფსიას და იტყოდნენ, აი, შევქმენით ქართული იმპერია ნიკოფსიიდან დარუბანდამდე! რა გარეჯის გასხვისება გაუკვირდა ხალხს ამ ხალხისგან?!, - ამის შესახებ პოეტმა დავით მაღრაძემ „იმედის“ გადაცემაში „პოზიცია“ „ნაციონალურ მოძრაობაზე“ განაცხადა.

დავით გარეჯის თემაზე საუბრისა მაღრაძემ აღნიშნა, რომ იგი ამ საქმეს კარგად არ იცნობს და ამიტომ, იურიდიული ნიუანსების განხილვაში არ შევა, თუმცა მას სჯერა თავდაცვის მინისტრის ირაკლი ღარიბაშვილის, რომელიც გარეჯის თემაზე „იმედის“ ეთერში საუბრობდა.

„იურიდიული ნიუანსების განხილვაში არ შევალ, რადგან საქმის მასალას არ ვიცნობ და სიმართლე გითხრათ, იურისტის კვალიფიკაცია არ მეყოფა, რომ ერთი გადახედვით, ეს საქმე კარგად შევისწავლო, მაგრამ მოვუსმინე, ბატონ ირაკლი ღარიბაშვილს და ადამიანურად, აშკარად, ნდობას იმსახურებს. დამაჯერებელი იყო მისი საუბარი. სახელმწიფო მოღვაწე კაცი საუბრობდა დამაჯერებლად! ადამიანურად იყო სანდო და გასაგები. ერთი მინდა ვთქვა, ვინმეს გაუკვირდება, რომ ეს ასე იყოს?!, - განაცხადა მაღრაძემ.

მან ასევე „ნაციონალური მოძრაობაზე“ ისაუბრა, რომელსაც შეეძლო ხალხი საპირისპიროში დაეჯერებინა.

„არაფერს ვამტკიცებ, მაგრამ ერთი რამ არის - ეს ის ხალხია, ვინც წაგებული ომი მოგებულად გამოაცხადა, ვინც დაიჯერა, რომ რუსეთ მოუგებდა ომს. შემდეგ დაკარგა მიწაწყალი, უამრავი ლტოლვილები მივიღეთ. შემდეგ გეტოში იცეკვა ამ ხალხმა, სადაც ლტოლვილები ჩაასახლეს; შემდეგ მიწა-წყლის დაკარგვა იზეიმეს და აზეიმეს ხალხი. ეს ის ხალხია, მთელი საქართველოს ტერიტორია და მიწა-წყალი რომ დაეკარგათ და გორი და თბილისის ტრასა დარჩენოდათ მარტო, გორს დარუბანდს დაარქმევდნენ, თბილისს ნიკოფსიას და იტყოდნენ, აი შევქმენიტ ქართული იმპერია ნიკოფსიიდან დარუბანდამდე! რა გარეჯის გასხვისება გაუკვირდა ხალხს ამ ხალხისგან?!“, - განაცხადა დავით მაღრაძემ.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.