გივი მიქანაძე: აღმოვაჩინეთ, რომ ათეულობით ბათუ ქუთელია გვყოლია. საზოგადოებამ უნდა იცოდეს ვინ დააკვირდება არჩევნებს

გვინდა, რომ საზოგადოების წინაშე ყველაფერი იყოს მაქსიმალურად გამჭვირვალე. „ქართული ოცნება“ ყველაფერს აკეთებს იმისთვის, რომ ეს არჩევნები მშვიდობიანად, მაღალი დემოკრატიული სტანდარტებით ჩატარდეს და თითოეულ ადამიანს ჰქონდეს საშუალება, თავისუფლად გამოხატოს საკუთარი ნება, - ამის შესახებ „ქართული ოცნების“ წარმომადგენელმა, გივი მიქანაძემ „რუსთავი 2"-ის ეთერში განაცხადა.

მისი თქმით, დემოკრატიული პროცესის ძალიან მნიშვნელოვან კომპონენტს წარმოადგენს სადამკვირვებლო მისიების მიერ მონიტორინგის განხორციელება მიუკერძოებლად და სამართლიანად.

„ამ პროცესში მნიშვნელოვანია თითოეული დამკვირვებლის ჩართულობა. როდესაც ჩვენმა მონიტორინგის ჯგუფმა ჩაიხედა, თუ რა სიტუაცია გვქონდა კონკრეტულ ადგილობრივ სადამკვირვებლო ორგანიზაციებთან მიმართებაში, ჩვენთვისაც გასაოცარი იყო, რომ თურმე ყოველი მეოთხე ორგანიზაცია, რომელიც ცესკო-ს მიერ დარეგისტრირდა 31 ოქტომბრის არჩევნებზე დასაკვირვებლად, პირდაპირ კავშირშია სხვადასხვა პოლიტიკურ სუბიექტთან. საზოგადოებამ თვითონ განსაჯოს, რამდენად შეიძლება დავეყრდნოთ მათ დასკვნებს, მათ საჩივრებს. ორგანიზაცია, რომელსაც აფუძნებს დიმიტრი შაშკინი და ორგანიზაცია, რომელსაც ამჟამად ხელმძღვანელობს მურთაზ ზოდელავა, ნეიტრალურ ანგარიშს დადებს? ან კიდევ ისინი გარკვეულ პროვოკაციებს არ მოაწყობენ და საჩივრები არ წამოვა მათგან? ორგანიზაცია, რომელშიც გამგეობის წევრებად არიან ლევან ხაბეიშვილი, პაატა მანჯგალაძე, თეონა ჭალიძე, კიდევ ერთხელ ადასტურებს, რომ „ნაციონალური მოძრაობა“ და მისი განშტოებები, ფაქტობრივად, ერთმანეთთან კავშირში არიან. ეს ორგანიზაცია შეძლებს, რომ ნეიტრალური პოზიცია დაიკავოს საარჩევნო პროცესების დაკვირვებასთან მიმართებაში? კანონი მათ არ ზღუდავს“, - აღნიშნა მიქანაძემ.

მისი თქმით, სწორედ მოქმედიი ხელისუფლების დამსახურებაა, რომ ასეთ „მიკერძოებულ ორგანიზაციებსაც კი აქვთ შესაძლებლობა დააკვირდნენ პროცესებს“.

„არსებობს ანგარიში, რომელშიც მოცემულია ინფორმაცია, რომ კონკრეტულ პირებს აქვთ გადარიცხული კონკრეტული პარტიებისთვის შემოწირულობები ან მუშაობენ სხვადასხვა პარტიის ფრაქციებში, მათ შორის, პარლამენტის მოქმედი თანამშრომლები არიან სხვადასხვა ფრაქციაში. მათ აქვთ კონკრეტული ინტერესები და მიზანმიმართული განცხადებები გაკეთებული და ისინი პირდაპირ არიან დაკავშირებული ამ პარტიებთან. ცოტა ხნის წინ იყო ბათუ ქუთელიასთან დაკავშირებული საკითხი, როდესაც აღმოჩნდა, რომ არასამთავრობო ორგანიზაცია, რომელსაც ის ხელმძღვანელობს, აწერდა ხელშეკრულებას ხელს, რომლითაც ლობისტებთან გარკვეულ გარიგებაში შედიოდნენ. დღეს კი აღმოვაჩინეთ, რომ ათეულობით ბათუ ქუთელია გვყოლია. საზოგადოებამ უნდა იცოდეს, ვინ აკვირდება ამ არჩევნებს“, - განაცხადა გივი მიქანაძემ.

მანამდე თეა წულუკიანმა განაცხადა, რომ არჩევნებზე დამკვირვებლად დარეგისტრირებული 129 ორგანიზაციიდან 32 პირდაპირ დაკავშირებულია, ან ამა თუ იმ ფორმით აფილირებული ოპოზიციასთან.