ეკა გიგაური შაშკინისა და ოქრიაშვილის მიერ იარაღის ტარებაზე: პარტიებმა არაფერი უნდა გააკეთონ ისეთი, რამაც შეიძლება ამომრჩეველი შეაშინოს

როდესაც ისედაც დაძაბული ვითარებაა, არჩევნები მიმდინარეობს, პოლიტიკური პარტიების წარმომადგენლებმა, არაფერი უნდა გააკეთონ ისეთი, რამაც შეიძლება შეაშინოს ამომრჩეველი, - ამის შესახებ „საერთაშორისო გამჭვირვალობა საქართველოს“ აღმასრულებელმა დირექტორმა, ეკა გიგაურმა „ნაციონალური მოძრაობის“ წევრების, დიმიტრის შაშკინისა და კახა ოქრიაშვილის მიერ იარაღის ტარების საკითხის კომენტირებისას განაცხადა.

მისი თქმით, ძალიან ბევრი ბარიერი აქვთ ჩვენს მოქალაქეებს, რადგან პანდემიის პირობებში ტარდება არჩევნები და ნუ შევუქმნით დამატებით განწყობებს, რომ არ მივიდნენ არჩევნებზე.

„როდესაც ისედაც დაძაბული ვითარებაა, არჩევნები მიმდინარეობს, პოლიტიკური პარტიების წარმომადგენლებმა, არაფერი უნდა გააკეთონ ისეთი, რამაც შეიძლება შეაშინოს ამომრჩეველი, ამიტომ, რა თქმა უნდა, მოვუწოდებთ აბსოლუტურად ყველა პოლიტიკური პარტიის წარმომადგენელს, გააკეთონ ყველაფერი, რათა ჩვენ საარჩევნო გარემოს შეფასებისას პრობლემები არ გვქონდეს და ასევე, გააკეთონ ყველაფერი, არ შეუქმნან განწყობა ამომრჩეველს, რომ საშიშია უბანზე მისვლა. ამიტომ, ძალიან მნიშვნელოვანია, რომ ყველა მოვიქცეთ ისე, როგორც ჩვენი ამომრჩევლებისთვის, ჩვენი ქვეყნისთვის იქნება უკეთესი. თუ პირს იარაღის ტარების უფლება აქვს, ცხადია ეს არ არის პრობლემა, მაგრამ ძალიან ცუდ აღქმას ტოვებს და ეს არის ძალიან ცუდი. ამიტომ, ყველას კიდევ ერთხელ მოვუწოდებთ, რომ ასეთი რამ არ გააკეთონ, ეს არის ცუდი, რადგან ჩვენ ისედაც ძალიან რთულ ვითარებაში გვიწევს არჩევნების ჩატარება, ძალიან ბევრი ბარიერი აქვთ ჩვენს მოქალაქეებს, რადგან პანდემიის პირობებში ტარდება არჩევნები და ნუ შევუქმნით დამატებით განწყობებს, რომ არ მივიდნენ არჩევნებზე. ამიტომ, წყნარ გარემოში არჩევნების ჩატარება არის ძალიან მნიშვნელოვანი“, - განაცხადა ეკა გიგაურმა.

სოციალურ ქსელში ვრცელდება ფოტო, რომელზეც „ნაციონალური მოძრაობის“ ერთ-ერთი ლიდერი, დიმიტრი შაშკინია გადაღებული. სავარაუდოდ, ფოტო ბოლნისის მუნიციპალიტეტის სოფელ ტალავერშია გადაღებული. ფოტოზე ჩანს, რომ შაშკინი აქტივისტებთან ერთად იმყოფება და შეიარაღებულია.

საქართველოში საპარლამენტო არჩევნები მიმდინარეობს. ამომრჩეველმა არჩევანი დღეს 50 საარჩევნო სუბიექტს - ორ ბლოკსა და 48 პარტიას შორის უნდა გააკეთოს. საპარლამენტო არჩევნებისთვის 38 ქვეყანაში 52 საარჩევნო უბანი გაიხსნა. 2020 წლის 31 ოქტომბრის არჩევნებისთვის კოვიდდაწესებულებებში 127 საარჩევნო უბანი მუშაობს. პენიტენციურ დაწესებულებებში კი 10 საარჩევნო უბანი გაიხსნა. არჩევნებს 132 ადგილობრივი და 23 საერთაშორისო ორგანიზაციის წარმომადგენელი აკვირდება. ამასთან, ამერიკული ორგანიზაცია Public Opinion Strategies „იმედის“ დაკვეთით ეგზიტპოლს ატარებს.