თეა წულუკიანი საერთაშორისო დამკვირვებლებსა და საელჩოებს მოუწოდებს, დაგმონ დესტრუქციული ოპოზიციის მხრიდან ძალადობრივი ქმედებები

ჩვენ ვხედავთ იმას, რომ ჩვენი მომხრეების ძალიან დიდი რაოდენობა მივიდა საარჩევნო ყუთთან და მინდა შევუერთდე მადლობების სერიას, რომელიც ჩვენი გუნდის წარმომადგენლებმა თქვეს. მადლობა ყველა „ქართული ოცნების“ მხარდამჭერს, რომელმაც საკუთარი არჩევანი გააკეთა და აკეთებს იმისთვის, რომ რადიკალური ძალები არ შეეცადონ და ქვეყანას არ დაუპირისპირონ არეულობის მცდელობები, - ამის შესახებ „ქართული ოცნების“ პარტიული სიის მეოთხე ნომერმა, თეა წულუკიანმა პარტიის ოფისში გამართულ ბრიფინგზე განაცხადა.

„ჩვენი გუნდის სახელით მინდა მივმართო საერთაშორისო დამკვირვებლებსა და ყველა საელჩოს - ყველამ ვნახეთ, რომ რადიკალური დესტრუქციული ოპოზიცია ძალადობრივ მეთოდებს მიმართავს, მაშინ როდესაც კანდიდატები რომელთაგან ზოგიერთი არის ასევე თავისი არჩევნების დამკვირვებელი, დადიან საარჩევნო უბნებზე იარაღით და ცდილობენ დააშინონ ამომრჩეველი, ეს არის მიუღებელი და ეს ყველამ ერთად უნდა დავგმოთ. ამიტომ, ამ ფაქტებზე ყურადღებას მივაპყრობთ საერთაშორისო დამკვირვებლებისა და ჩვენი საერთაშორისო პარტნიორების. ვხედავთ, რომ პოლიცია მუშაობს და არცერთი სახელმწიფო ინსტიტუტი არ დაუშვებს იმას, რომ რაიმე ტიპის დესტრუქციული მცდელობა იყოს რაიმე ტიპის შედეგის მომტანი“, - განაცხადა თეა წულუკიანმა.

სოციალურ ქსელში ვრცელდება ფოტო, რომელზეც „ნაციონალური მოძრაობის“ ერთ-ერთი ლიდერი, დიმიტრი შაშკინია გადაღებული. სავარაუდოდ, ფოტო ბოლნისის მუნიციპალიტეტის სოფელ ტალავერშია გადაღებული. ფოტოზე ჩანს, რომ შაშკინი აქტივისტებთან ერთად იმყოფება და შეიარაღებულია.

საქართველოში საპარლამენტო არჩევნები მიმდინარეობს. ამომრჩეველმა არჩევანი დღეს 50 საარჩევნო სუბიექტს - ორ ბლოკსა და 48 პარტიას შორის უნდა გააკეთოს.საპარლამენტო არჩევნებისთვის 38 ქვეყანაში 52 საარჩევნო უბანი გაიხსნა.2020 წლის 31 ოქტომბრის არჩევნებისთვის კოვიდდაწესებულებებში 127 საარჩევნო უბანი მუშაობს.პენიტენციურ დაწესებულებებში კი 10 საარჩევნო უბანი გაიხსნა. არჩევნებს 132 ადგილობრივი და 23 საერთაშორისო ორგანიზაციის წარმომადგენელი აკვირდება. ამასთან, ამერიკული ორგანიზაცია Public Opinion Strategies „იმედის“ დაკვეთით ეგზიტპოლს ატარებს.