ირაკლი კობახიძე: უბედურებაა, როდესაც „ნაციონალური მოძრაობა“ რამდენიმე ასეულ ათას ხმას იღებს და ჩვენ ამის მიზეზს შევისწავლით

უბედურებაა როდესაც „ნაციონალური მოძრაობა“ რამდენიმე ასეულ ათას ხმას იღებს და ჩვენ ამის მიზეზს შევისწავლით, - ამის შესახებ „ქართული ოცნების“ აღმასრულებელმა მდივანმა ირაკლი კობახიძემ პარტიის ოფისში გამართულ ბრიფინგზე განაცხადა.

„ჩვენ წინასწარ ვამბობდით, რომ ოპოზიციას არჩევნები წაგებული ჰქონდა, მარცხს ისინი არ შეეგუებოდნენ და იქნებოდა დესტრუქციის გარკვეული მცდელობა, თუმცა ეს არის მხოლოდ მცდელობა.

სიმართლე არის „ქართული ოცნების“ მხარეს არა მხოლოდ არჩევნების თვალსაზრისით, არამედ მთლიანად იმ 8 წლის თვალსაზრისით, რომელიც ჩვენ გამოვიარეთ, როდესაც ჩვენ მოვახერხეთ იმ უბედურების შეცვლა და ფუნდამენტურად გარდატეხა, რაც ჩამოაყალიბა თავის დროზე „ნაციონალურმა მოძრაობამ“. შეშფოთებას იწვევს ის, რომ რამდენიმე ასეული ათასი ხმა მიიღო იმ პოლიტიკურმა პარტიამ, რომელმაც ამდენი უბედურება დააწია ჩვენს ქვეყანას. ეს არის სერიოზული შეშფოთების საგანი და ამაზე გვჭირდება ყურადღების გამახვილება, ამის მიზეზები უნდა შევისწავლოთ და ამაზე დაგვჭირდება შესაბამისი რეაგირება. უბედურებაა, როდესაც ასეთი პოლიტიკურ პარტია რამდენიმე ასეულ ათას ხმას იღებს არჩევნებში, ამ უბედურებას შველა სჭირდება და ჩვენ ამაზე ვიმუშავებთ“, - განაცხადა ირაკლი კობახიძე.

საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ - 48,15 %; „ნაციონალური მოძრაობა - გაერთიანებული ოპოზიცია“ - 27,14%; „ევროპული საქართველო“ - 3.78%; „ლელო“ – 3,15%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. რაც შეეხება დანარჩენ პარტიებს, მათ ამომრჩეველთა ხმების ერთ პროცენტზე ნაკლები აქვთ. საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.

ოპოზიციის ნაწილი აქციებს აანონსებს. ისინი აცხადებენ, რომ არჩევნები გაყალბებულია და ერთიან სამოქმედო გეგმაზე მსჯელობენ. მათი ერთ-ერთი სცენარი არის ის, რომ ბოიკოტი გამოაცხადონ, უარი თქვან მანდატებზე და არ შევიდნენ პარლამენტში.

მანდატებზე უარი უკვე ოფიციალურად თქვეს „პატრიოტთა ალიანსმა“, „ევროპულმა საქართველომ“, „ლეიბორისტულმა პარტიამ“,„ლელომ“ და „ნაციონალურმა მოძრაობამ“.