ეკა ბესელია: მაქვს მოლოდინი, რომ ალეკო ელისაშვილი შევა პარლამენტში, ხოლო „გირჩი“ ბოიკოტის რეჟიმში დარჩება

მაქვს მოლოდინი, რომ ალეკო ელისაშვილი შევა პარლამენტში, ხოლო „გირჩი“ ბოიკოტის რეჟიმში დარჩება, - ამის შესახებ პოლიტიკური პარტია „სამართლიანობისთვის“ თავმჯდომარე ეკა ბესელიამ ტვ „პირველის“ ეთერში განაცხადა.

ეკა ბესელია აცხადებს, რომ პოლიტიკური ბოიკოტისგან უნდა განვასხვავოთ მანდატზე უარის თქმა, რადგან ბევრი პოლიტიკოსი სიტყვებით „ჟონგლიორობს“. „რომ არ წერ განცხადებას უფლებამოსილების შეწყვეტაზე, ეს ნიშნავს, რომ ხელფასსაც იღებ, სტატუსითაც სარგებლობ, ითვლები როგორც პარლამენტის წევრი, ამიტომ თუ ოდნავ მაინც საკუთარ თავს პატივს სცემს პოლიტიკოსი და საკუთარ გადაწყვეტილებას ფასს ადებს, უფლებამოსილება უნდა შეიწყვიტოს“, - აღნიშნა ბესელიამ.

მისი თქმით, პარლამენტის მანდატი ფასილიტატორ ელჩებთან დიალოგის დროს საჭირო არაა. „ჩვენ ელჩებთან დიალოგი მუდმივად გვაქვს და ყოველთვისაა შესაძლებლობა, რომ ასეთი დიალოგი შედგეს“, - განაცხადა ბესელიამ.

5-მა ოპოზიციურმა პარტიამ დეპუტატის მანდატზე უარის თქმისა და საარჩევნო სიების ჩახსნის შესახებ დოკუმენტები გააფორმა. ოპოზიციის მიერ მომზადებული დოკუმენტების ხელმისმოწერის პროცესს არ დასწრებიან პარტიები: „გირჩი“, „რესპუბლიკური პარტია“ და „ალეკო ელისაშვილი - მოქალაქეები“. „გირჩი“ და "რესპუბლიკური პარტია" აცხადებენ, რომ პარლამენტში არ შედიან და დეპუტატის მანდატზე უარს ამბობენ, უბრალოდ ამის დამადასტურებლად ცერემონიებში მონაწილეობის საჭიროებას ვერ ხედავდნენ.

პროპორციული საარჩევნო სიის ანულირების მოთხოვნით, ცენტრალურ საარჩევნო კომისიას ამ დროისათვის ხუთმა ოპოზიციურმა ძალამ მიმართა, ესენია: „ერთიანი ნაციონალური მოძრაობა - ძალა ერთობაშია”, „ევროპული საქართველო”, „ლეიბორისტული პარტია”, „სტრატეგია აღმაშენებელი” და „ლელო საქართველოსთვის“.