არასამთავრობოები თვითმმართველი ქალაქების სათემო მუნიციპალიტეტებთან გაერთიანებას ასაჩივრებენ

საქართველოს პარლამენტის დადგენილება თვითმმართველი ქალაქების სათემო მუნიციპალიტეტებთან გაერთიანების შესახებ არასამთავრობო ორგანიზაციებმა სასამართლოში გაასაჩივრეს. არასამთავრობორები მოითხოვენ სასამართლომ ბათილად ცნოს დადგენილება, რომლითაც გორის, ამბროლაურის, მცხეთის, ოზურგეთის, თელავის, ახალციხისა და ზუგდიდის მუნიციპალიტეტები შეიქმნა.

"მიუხედავად საზოგადოებრივი ორგანიზაციებისა და ადგილობრივი მოსახლეობის მოთხოვნისა, რომ თვითმმართველობის კოდექსის მიხედვით მომხდარიყო საკოთხის საჯარო განხილვა, ხელისუფლებამ უარი თქვა ამ განხილვაზე, პროცესი დახურულ კარს მიღმა წარმართა და გადაწყვეტილება ფორსირებულად მიიღო", - აცხადებენ თვითმმართველობის საკითხებზე მომუშავე არასამთავრობოები.

მათივე განმარტებით, საქართველოს რეგიონული განვითარებისა და ინფრასტრუქტურის სამინისტრომ ჯერ მუნიციპალიტეტებში, შემდგომ კი საქართველოს პარლამენტში გაგზავნილ დოკუმენტაციაში მიუთითა, რომ მოსახლეობასთან შეხვედრები „თვითმმართველობათა ეროვნულმა ასოციაციამ“ გამართა.

"აღსანიშნავია, რომ მოსახლეობასთან შეხვედრები, „ადგილობრივი თვითმმართველობის კოდექსის“ შესაბამისად, უნდა გაემართა რეგიონული განვითარების სამთავრობო კომისიას და არა სხვა რომელიმე ორგანიზაციას. გარდა ამისა, „თვითმმართველობათა ეროვნული ასოციაციის“ მიერ გამოცემულ ოქმში პირდაპირ წერია, რომ მან გამართა 7 რეგიონული შეხვედრა, რომელსაც, უმეტესად, მერები/გამგებლები, საკრებულოსა და სამხარეო ადმინისტრაციების წარმომადგენლები ესწრებოდნენ. შეხვედრების შესახებ ინფორმაცია მოსახლეობისათვის წინასწარ ცნობილი არ იყო. შესაბამისად, ეს შეხვედრები მათთან კონსულტაციის მიზნით ვერ ჩატარდებოდა. ამასთან, ადგილობრივ მოსახლეობასთან შეხვედრები სათემო მუნიციპალიტეტებსა და თვითმმართველ ქალაქებში ცალ-ცალე უნდა გამართულიყო",- აცხადებენ არასამთავრობო სექტორში.

მათივე განმარტებით, მიუხედავად იმისა, რომ სამინისტრო მოსახლეობასთან გამართული კონსულტაციების შესახებ ოფიციალურად „თვითმმართველობის ეროვნული ასოციაციის“ მიერ გამართულ შეხვედრებზე მიუთითებს, მან, მოთხოვნის მიუხედავად, არასამთავრობო ორგანიზაციებს შეხვედრების დამადასტურებელი დოკუმენტები არ მიაწოდა.

"აქედან გამომდინარე, არასამთავრობო ორგანიზაციები მიიჩნევენ, რომ დაირღვა „ადგილობრივი თვითმმართველობის კოდექსის“ 10.2 მუხლის სავალდებულო მოთხოვნა "შესაბამისი მუნიციპალიტეტის მოსახლეობასთან კონსულტაციის" შესახებ და მოითხოვენ, სასამართლომ ბათილად ცნოს პარლამენტის მიერ მიღებული დადგენილება, ვინაიდან მსგავს რეჟიმში წარმოებული რეფორმის შედეგი არა მხოლოდ ამ რეფორმის ლეგიტიმაციის მიმართ აჩენს შინაარსობრივ კითხვებს , არამედ უშუალოდ პროცედურის კანონიერება დგება კითხვის ნიშნის ქვეშ, რის გამოც სასამართლოსთვის წარდგენილი მოთხოვნები სრულად უნდა დაკმაყოფილდეს",- ნათქვამია განცხადებაში, რომელსაც უერთდებიან შემდეგი არასამთავრობო ორგანიზაციები: საია, "სამართლიანი არჩევნები", "ფონდი ღია საზოგადოება საქართველო", რეგიონის განვითარების ცენტრი, სიდა, მმართველობითი სისტემების განვითარების ცენტრი.

"თვითმმართველობის შესახებ კანონში“ცვლილებების შესახებ  პარლამენტის შესაბამისი დადგენილება, რომელიც მმართველმა გუნდმა მიიღო, უკვე საკანონმდებლო მაცნეშიც გამოქვეყნდა. დადგენილებას პარლამენტის ვიცესპიკერი ზვიად ძიძიგური აწერს ხელს და დოკუმენტი 15 ივნისით თარიღდება. განსახილველ საკითხთა სიაშია ასევე ცვლილებები კანონში, რომელიც ამ ცვლილებების ვადებს დაადგენს.
დადგენილებამ 7 თვითმმართველი ქალაქის გაუქმებაზე უკვე შეუქმნა უხერხულობა ცენტრალურ საარჩევნო კომისიას, რადგან პარალელურად ცენტრალური საარჩევნო კომისიის ვებგვერდზე გამოქვეყნდა განკარგულება, რომელიც თვითმმართველობის არჩევნებისთვის საარჩევნო ოლქების საზღვრებს განსაზღვრავს. ამ დოკუმენტის მიხედვით, თვითმმართველი ქალაქები და მუნიციპალიტეტები ცალ-ცალკე ოლქებად არის მითითებული.