არჩილ თალაკვაძე ამნისტიის შესახებ კანონის მიღებაზე: ეს გადაწყვეტილება ადამიანის უფლებებისა და საზოგადოების უსაფრთხოების ოქროს შუალედში მივიღეთ

ეს გადაწყვეტილება ადამიანის უფლებებისა და საზოგადოების უსაფრთხოების ოქროს შუალედში მივიღეთ, - განაცხადა საქართველოს პარლამენტის თავმჯდომარემ, არჩილ თალაკვაძემ რიგგარეშე სესიის პლენარული სხდომის შემდეგ, ჟურნალისტებთან ამნისტიის შესახებ კანონის მიღებაზე საუბრისას.

„ეს ამნისტია უნდა მიღებულიყო. ჩვენ ის მივიღეთ იმ საუკეთესო, ოქროს შუალედში, რომლითაც, ერთი მხრივ, ათასობით ადამიანს რესოციალიზაციისა და საზოგადოებაში, ოჯახებში დაბრუნების საშუალებას და მეორე მხრივ, საზოგადოებას ვაძლევთ იმის გარანტიასა და პირობებს, რომ ეს ამნისტია ქვეყანაში უსაფრთხოების დონეს არ გააუარესებს და მართლწესრიგს არ დააზიანებს. ეს გადაწყვეტილება ადამიანის უფლებებისა და საზოგადოების უსაფრთხოების ოქროს შუალედში მივიღეთ“, - განაცხადა არჩილ თალაკვაძემ.

საქართველოს მეათე მოწვევის პარლამენტმა „ამნისტიის შესახებ“ კანონი ცოტა ხნის წინ მიიღო. ახალი აქტი ეხება 1 500-ზე მეტ პატიმრობაში მყოფ პირს, 4 ათასზე მეტ ადამიანს, რომელთაც სისხლის სამართლის ჯარიმა და 10 ათასზე მეტ ისეთ პირს, რომელიც პრობაციის რეჟიმის ქვეშაა.