პარლამენტში კოვიდპანდემიასთან დაკავშირებით შექმნილი სამეცნიერო-საკონსულტაციო საბჭოს სხდომა გაიმართა

ჯანმრთელობის დაცვისა და სოციალურ საკითხთა კომიტეტში კოვიდპანდემიასთან დაკავშირებით შექმნილი სამეცნიერო-საკონსულტაციო საბჭოს პირველი სხდომა გაიმართა, რომელსაც კომიტეტის თავმჯდომარე დიმიტრი ხუნდაძე უძღვებოდა.

დიმიტრი ხუნდაძის განცხადებით, თითქმის ერთი წელი გავიდა კოვიდინფექციის პირველი დადასტურებული შემთხვევიდან, თუმცა ქვეყანას, ისევე როგორც მსოფლიოს ისევ პანდემიის რეჟიმში უწევს ცხოვრება და ეს თემა კვლავაც ერთ-ერთი აქტუალური, მნიშვნელოვანი და ყველაზე საპასუხისმგებლოა.

მისი თქმით, ამ ვითარებაში, საპარლამენტო კომიტეტის როლი და საქმიანობა კიდევ უფრო განსაკუთრებულ მნიშვნელობას იძენს ამ გლობალურ გამოწვევასთან დაკავშირებით, ვინაიდან წინ გვაქვს ისევ რთული პერიოდი.

როგორც დარგის სპეციალისტები ვარაუდობენ, მოსალოდნელია ინფიცირების მესამე ტალღა, ამიტომ ქვეყანა ყველაზე ცუდი სცენარისთვის უნდა იყოს მომზადებული.

„ამიტომ, ჩვენ გამოვიყენეთ პარლამენტში რესურსი სამეცნიერო-საკონსულტაციო საბჭოს ფორმატში და ვთხოვეთ დარგის სპეციალისტებს, კრიზისის მართვის სპეციალისტებს, ეპიდემიოლოგებს, ინფექციონისტებს, რომ საბჭოს მუშაობაში მიიღონ მონაწილეობა და რეკომენდაციის სახით შევიმუშაოთ და შემდეგ დავეხმაროთ აღმასრულებელ ხელისუფლებას, იგივე საკოორდინაციო საბჭოს, რომელსაც წარედგინება შემდეგ ეს რეკომენდაციები და იქნება უკვე საერთო საბოლოო გადაწყვეტილება მიღებული“, - განაცხადა დიმიტრი ხუნდაძემ.

სამეცნიერო-საკონსულტაციო საბჭოს სხდომაზე ჯანმრთელობის დაცვისა და სოციალურ საკითხთა კომიტეტის წევრებმა, ასევე, სამედიცინო დარგის სპეციალისტებმა, თენგიზ ცერცვაძემ, ბიძინა კულუმბეგოვმა, აკაკი ზოიძემ, მაია ბუწაშვილმა, ზურაბ ოტიაშვილმა კიდევ ერთხელ შეაფასეს არსებული ვითარება და აღნიშნეს, რომ ყველაფერი უნდა გაკეთდეს, მათ შორის, საკანონმდებლო დონეზე იმისათვის, რომ კოვიდინფექციის გავრცელების მესამე ტალღის შემთხვევაში ზიანი იმაზე მეტი არ აღმოჩნდეს, რაც უკვე მიიღო ქვეყანამ.

როგორც აღინიშნა, ამ შეხვედრის მიზანიც ხომ ისაა, რომ შეიქმნას გარკვეული გზამკვლევი იმისათვის, რომ რისკები იყოს საკმაოდ მინიმიზებული.

შეხვედრაზე მსჯელობა ძირითადად კლინიკაში მიღების და კლინიკიდან გაწერის გზამკვლევის შექმნას დაეთმო. ასევე აღინიშნა, რომ მომავალში გარკვეული შეზღუდვების შემსუბუქების პარალელურად, კარგი იქნება, თუკი რეგულაციებზე კონტროლი გამკაცრდება, კოვიდკლინიკებისა და სასწრაფოებისთვის დროებითი რეგულაციები იქნება შემოღებული.

„ვფიქრობ, პირველი შეხვედრა იყო ნაყოფიერი, საქმიანიც. გაცნობითი შეხვედრა გადაიზარდა კონკრეტული თემების განხილვაში. ახლა, რა თქმა უნდა, აქტუალურია ვაქცინაციის თემა და დარგის სპეციალისტებმა დააყენეს მოსახლეობის ინფორმირებულობის საკითხი. შეაფასეს იგი როგორც პრობლემური, რამეთუ არსებობს მოსაზრებები, რომ ვიღაცას არ სჯერა კოვიდინფექციის, ვიღაც უნდობლობას უცხადებს ვაქცინას, არადა, მნიშვნელოვანია ვაქცინაცია შესაძლო რესურსის ფარგლებში მოხდეს, მაქსიმალურად მოხდეს მისი ათვისება. ამიტომ, ჩვენ შევთანხმდით, რომ შევიმუშავებთ საერთო გეგმას, როგორ მივიტანოთ მოსახლეობამდე ვაქცინაციის სარგებლიანობა და, ასე ვთქვათ, მისი შესაძლო რისკები დავაზღვიოთ. დღეს კომიტეტმა მიიღო კიდეც საკანონმდებლო ინიციატივა ამასთან დაკავშირებით. ჩვენ ასევე შევთანხმდით, რომ პროტოკოლებზე ვიმუშავებთ - პაციენტების კლინიკაში მიღებაზე და იქიდან პაციენტების გაწერის თაობაზე, რომ ეს გარკვეული წესების თანხვედრით მოხდეს და არა ქაოტურად, რომ არ მოხდეს პაციენტის სტაციონარული მომსახურების გარეშე დატოვება და არ მოხდეს კლინიკების ზედმეტად გადატვირთვა, რაც შესაბამის რისკებს შეიცავს“, - განაცხადა დიმიტრი ხუნდაძემ.

კომიტეტმა პროტოკოლის გარკვეული ვარიანტი შესთავაზა საბჭოს წევრებს. მას შემდეგ, რაც ისინი ამ ვარიანტს განიხილავენ და შესაბამის რეკომენდაციებს მიაწვდიან კომიტეტს, მიიღება საბოლოო გადაწყვეტილება, რომელიც შემდეგ სამთავრობო საკოორდინაციო საბჭოს წარედგინება.