გიორგი გახარია: ერთი კონკრეტული ადამიანის მიმართ, თუნდაც კანონიერი მართლმსაჯულებით განსაზღვრული ღონისძიების აღსრულება, თუ ეს ქმნის პოლიტიკურ ესკალაციას, არის მიუღებელი

გიორგი გახარიას თქმით, მიუღებელია ერთი კონკრეტული ადამიანის მიმართ, თუნდაც კანონიერი მართლმსაჯულებით განსაზღვრული ღონისძიების აღსრულება, თუ ეს რისკს უქმნის მოქალაქეების ჯანმრთელობას, სიცოცხლეს ან საერთოდ, ქვეყანაში ქმნის პოლიტიკური ესკალაციას. ამის შესახებ მან მთავრობის ადმინისტრაციაში გამართულ ბრიფინგზე განაცხადა. მან აღნიშნა, რომ პოლიტიკური დაძაბულობა და პოლარიზაცია ქვეყანაში უსაფრთხოების რისკებს ქმნის.

„გუშინ ნიკა მელიას სასამართლომ აღკვეთის ღონისძიებად პატიმრობა შეუფარდა. ეს არის ადამიანი, რომელიც დიდად არასდროს სცემდა პატივს ქართულ კანონმდებლობას და ეს გახლავთ ადამიანი, რომელიც 20 ივნისს მოუწოდებდა ჩვენს მოქალაქეებს პარლამენტის შტურმისკენ და იყო ერთ-ერთი ორგანიზატორი პარლამენტში შეჭრის. მაგრამ მიუხედავად ყველაფრისა, ჩემი აბსოლუტურად ურყევი პოზიციაა, რომ ერთი კონკრეტული ადამიანის მიმართ, თუნდაც კანონიერი მართლმსაჯულებით განსაზღვრული ღონისძიების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ, ქვეყანაში ქმნის პოლიტიკური ესკალაციას, არის მიუღებელი. დღეს, განსაკუთრებით, როდესაც ჩვენს ქვეყანაში პოლიტიკური დაძაბულობა და პოლარიზაცია თვითონ ქვეყნის გარეთ განვითარების და შემდგომ ქვეყნის უსაფრთხოების და მომავლის რისკებს ქმნის.

მაშინ, როდესაც ჩვენ, ყველანი, ჩვენს მოქალაქეებთან ერთად ვებრძვით გლობალურ პანდემიას, ეკონომიკურ კრიზისს, რეგიონალურ გამოწვევებს და რაც მთავარია, ვებრძვით პოლარიზაციას, რათა უკეთესი მომავალი მივცეთ ჩვენს შვილებს, ასეთი ღონისძიება უნდა ჩატარდეს მხოლოდ მაშინ, როდესაც გადაზღვეული იქნება ყველა სახის რისკი და როდესაც არანაირი რისკი არ იარსებებს, არც ერთი, მიუხედავად პოლიტიკური მიზანშეწონილობისა ან ორიენტაციისა, თითოეული ჩვენი მოქალაქის და რაც ყველაზე მნიშვნელოვანია, არ შექმნის არანაირ საბაბს ესკალაციის. ამიტომ, იქედან გამომდინარე, რომ მე, სამწუხაროდ, ჩემს გუნდთან ერთად ვერ მივაღწიე ერთობლივ აზრს ამ საკითხთან დაკავშირებით, მივიღე გადაწყვეტილება, გადავდგე დაკავებული თანამდებობიდან. რა თქმა უნდა, მჯერა და მინდა, მჯეროდეს, რომ ეს ნაბიჯი ხელს შეუწყობს ჩვენი ქვეყნის პოლიტიკურ სივრცეში პოლარიზაციის შემცირებას, რამეთუ დარწმუნებული ვარ, რომ პოლარიზაცია და დაპირისპირება ჩვენ შორის არის ყველაზე დიდი რისკი ჩვენი ქვეყნის მომავლის ეკონომიკური განვითარების და ყველა სახის კრიზისის გამკლავების“, - განაცხადა გახარიამ.

გიორგი გახარია „ქართული ოცნების“ მთავრობის რიგით მეხუთე პრემიერი იყო. მანამდე სხვადასხვა კერძო ორგანიზაციაში ხელმძღვანელ პოზიციებზე მუშაობდა. 2016 წლიდან ის აქტიურად ჩაერთო საზოგადოებრივ საქმიანობაში - იყო ბიზნესომბუდსმენი. 2014-დან 2016 წლამდე პრემიერ-მინისტრის მრჩეველი ეკონომიკურ საკითხებში - ეკონომიკური საბჭოს მდივანი.

ამის შემდეგ გახარიამ ეკონომიკის მინისტრის პორტფელი ჩაიბარა, რომელსაც 2017 წლის ნოემბრამდე იკავებდა. შემდეგ კი შინაგან საქმეთა მინისტრი გახდა. ამ თანამდებობაზე ის ორი წლის განმავლობაში მუშაობდა.

2019 წელს გიორგი გახარია ეროვნული უსაფრთხოების საბჭოს მდივნად დაინიშნა, ამავე წლის ბოლოს კი პარლამენტმა გახარიას ნდობა პრემიერ-მინისტრის რანგში გამოუცხადა. ბოლო პერიოდში მან საზოგადოებას თავი პანდემიასთან ეფექტიანი ბრძოლის მიმართულებით დაამახსოვრა.

20 ივნისის მოვლენების შემდეგ გახარია ოპიზიციის მხრიდან კრიტიკის ობიექტი არაერთხელ გამხდარა, მას ადანაშაულებდნენ აქციის დაშლის დროს მოქალაქეების დაშავებაში. კიდევ უფრო ადრე იყო გიორგი გახარიას საყოველთაო ბოდიში, როცა მან ღამის კლუბებზე განხორციელებული რეიდის დროს გამოწვული ვნებათაღელვის გამო, პარლამენტის წინ შეკრებილებს მიმართა და სიტყვითაც გამოვიდა.