„ნაცმოძრაობის“ წევრებმა ნიკა მელიას მხარდასაჭერად აქცია-მსვლელობა გამართეს

„ნაციონალური მოძრაობის“ წევრებმა პარტიის თავმჯდომარის, ნიკა მელიას მხარდასაჭერად რესპუბლიკის მოედნიდან რუსთავის ციხემდე ავტოკოლონით აქცია-მსვლელობა გამართეს. მათი განცხადებით, აქციის მიზანი ნიკა მელიას გამხნევებაა.

პარტიის ლიდერები კვლავ აცხადებენ, რომ მელია გირაოს გადახდას არ აპირებს და საპატიმროდან მის უპირობო გათავისუფლებას ითხოვენ.

„გირაო გაუქმდა მას შემდეგ, რაც აღკვეთ ღონისძიებად დაენიშნა პატიმრობა, ამიტომ გირაო, როგორც ასეთი, ბუნებაში არ არსებობს. შესაბამისად ვერც მის გადახდაზე შეიძლება ლაპარაკი. თუმცა, რომც არსებობდეს, არ გადაიხდის, ვინაიდან ეს არის უკანონობა და ორმაგი სტანდარტი“, - განაცხადა გიორგი ბარამიძემ.

ზაალ უდუმაშვილს კი მიაჩნია, რომ კრიზისის განმუხტვის საუკეთესო გზა პროკურატურის მიერ აღკვეთი ღონისძიების შეცვლის მოთხოვნაა.

„რატომ არ შედის პროკურატურა აღკვეთი ღონისძიების შეცვლის მოთხოვნით თუ მას რეალურად სურს განმუხტოს ქვეყანაში პოლიტიკური კრიზისი? ეს ყველაზე მარტივი გზაა, რომელიც უნდა აერჩია ხელისუფლებას და ამით განიმუხტებოდა პოლიტიკური კრიზისი ქვეყანაში“, - აცხადებს უდუმაშვილი.

თავის მხრივ, დავით კირკიტაძე აცხადებს, რომ „ნიკა მელიას თვითმიზანი ნამდვილად არ არის ის, რომ იჯდეს ციხეში, თუმცა ყველაფერს თავისი წესი და რიგი აქვს“.

„ქართულმა ოცნებამ“ ის უკანონოდ დააპატიმრა და ღირსების შემლახველ შემოთავაზებებს მათგან ნიკა არ მიიღებს, მათ კარგად იციან როგორ იღება ციხის კარი, ამის ბერკეტი და კანონით ამის საშუალება აქვს პროკურატურას და კეთილი ინებონ, როგორც დააკავეს, ისე გამოუშვან“, - აცხადებს კირკიტაძე.

„ნაციონალური მოძრაობის“ თავმჯდომარემ, ნიკა მელიამ გირაოზე კვლავ უარი თქვა.

20 ივნისის საქმეებზე ამნისტიის შესახებ კანონი შარლ მიშელის შეთანხმების ნაწილია, რომელსაც პარტიებმა ხელი 19 აპრილს მოაწერეს.