ირაკლი კობახიძე: გახარიას ბურჭულაძიზაციის პროცესი არის დაწყებული, მიმდინარეობს და აუცილებლად ბოლომდე მივა

გახარიას ბურჭულაძიზაციის პროცესი არის დაწყებული, მიმდინარეობს და აუცილებლად ბოლომდე მივა, - ასე გამოეხმაურა ირაკლი კობახიძე IPSOS-ის კვლევას, რომლის თანახმად, გამოკითხულთა 32% ხმას მმართველ გუნდს, 23% „ნაციონალურ მოძრაობას“, 8% კი გიორგი გახარიას პარტიას „საქართველოსთვის“ მისცემდა.

„გამომდინარე იქიდან, რომ წინა არჩევნებზე IPSOS-მა ყველას და ყველაფერს ააცილა, ნდობა ამ კომპანიის მიმართ არის მინიმალური. როდესაც პარტიული ტელევიზია უკვეთავს კვლევას, ის დებს იმ შედეგებს, რომელიც აწყობს. ეს იყო წინა არჩევნებზე და იგივე ხდება ამ არჩევნებზეც. რა რაოდენობის ხმებს აიღებს „ქართული ოცნება“, ეს საზოგადოებაზე არის დამოკიდებული. ჩვენ გვაქვს რწმენა, რომ 43%-ს კარგად გადავცდებით. იმ კვლევაზე დაფუძნებით, რომლის მიმართაც არის ნულოვანი ნდობა, ვერანაირ განცხადებას ვერ გავაკეთებ, ეს კვლევა არის ჰაერიდან მოტანილი, არცერთი ციფრის განხილვას აზრი არ აქვს, ეს მხოლოდ აჩვენებს რა სურს „ნაციონალურ მოძრაობას“ და მათ ტელევიზიას. მათ „ნაცმოძრაობისა“ და გახარიას მაქსიმალურად რეკლამირება სურთ იმიტომ, რომ ის ამ პოლიტიკურ ძალასთან ალიანსშია, რაც ძალიან კარგად გამოიკვეთა იმ საეჭვო დამთხვევით, რომელიც ვიხილეთ ვაშინგტონში. ისინი გახარიას არეკლამებენ, რომ რაღაცნაირად 1-2% წაართვას „ქართულ ოცნებას“. ამით გაიშიფრა „ნაციონალური მოძრაობის“ განზრახვა“, - განაცხადა ირაკლი კობახიძემ.