ლაშა თორდია მომავალ გენერალურ აუდიტორს რჩევას აძლევს

სახელმწიფო აუდიტის სამსახურის უფროსი ლაშა თორდია მომავალ გენერალურ აუდიტორს რჩევას აძლევს. მისი თქმით, მომავალმა აუდიტორმა დამოუკიდებლობა, ობიექტურობა უნდა შეინარჩუნოს და ყველას მისამართით სამართლიანი უნდა იყოს. ამის შესახებ ინფორმაციას 1tv.ge ავრცელებს.

"მომავალ გენერალურ აუდიტორს ვურჩევდი, რომ დამოუკიდებლობა, ობიექტურობა შეინარჩუნოს და ყველას მისამართით სამართლიანი იყოს. პირადად მე, დამოუკიდებლობის შენარჩუნებასთან დაკავშირებით პრობლემები არ მქონია და ვინმეს ზეგავლენის ქვეშ არ ვყოფილვარ, რის გამოც, ამ სამსახურის მისამართით ამხელა საზოგადოებრივი ინტერესია. კერძოდ, იმ დასკვნების მისამართით, რომელსაც ვაქვეყნებთ და ვმუშაობთ. ყველა იმ შენიშვნასა და პრობლემურ საკითხებზე ობიექტურად ვწერთ, რასაც ცალკეულ უწყებებში ვაწყდებით. ზუსტად დამოუკიდებლობა განაპირობებს საზოგადოების ნდობასაც და ინტერესსაც", - განაცხადა ლაშა თორდიამ. 

თორდიამ აუდიტორად მუშაობის მისი 5-წლიანი სამუშაო პერიოდიც შეაჯამა და მას "ნაყოფიერი" უწოდა.

"მიმაჩნია, რომ განვლილმა ხუთმა წელმა ძალიან პროდუქტიულად ჩაიარა და აუდიტის სამსახურის მაჩვენებლები მნიშვნელოვნად გაიზარდა. საქმიანობის ფარგლებში, ყველა მეთოდოლოგია დავხვეწეთ და საერთაშორისო სტანდარტებთან მოვიყვანეთ... ვთვლი, რომ ხუთწლიანი მუშაობა ძალიან ნაყოფიერი იყო. ყველა თანამშრომელი მოწადინებული იყო, რომ თავისი საქმე დამოუკიდებლად, მიუკერძოვებლად და სამართლიანად განეხორციელებინა. ამ სამსახურის მთავარი გამოწვევა დამოუკიდებლობაა ყველა პოლიტიკური სუბიექტის მხრიდან. ეს პრინციპები უზრუნველყოფილი უნდა იყოს, რომ ამ სამსახურის მიმართ საზოგადოებრივი ნდობა იყოს, მათ შორის პარლამენტის მხრიდან“-, განაცხადა თორდიამ.

რაც შეეხება მის სამომავლო პოლიტიკურ გეგმებს, ლაშა თორდია პოლიტიკაში წასვლას გამორიცხავს.

"პოლიტიკაში მოსვლას გამოვრიცხავ, პოლიტიკაში მოსვლას არ ვაპირებ. ცუდიც კი იქნებოდა, რომ გენერალური აუდიტორი პირდაპირ პოლიტიკაში დაბრუნდეს. ამ ეტაპზე, მცირე ხანი დავისვენებ, რადგან ის ფუფუნება არ მაქვს, რომ დიდი ხანი დავისვენო. გარკვეული შეთავაზებები კერძო სექტორიდან მაქვს, სახელმწიფო უწყებებიდან არანაირი შეთავაზება არ მქონია. რამდენიმე შემოთავაზებაა საერთაშორისო ორგანიზაციებიდანაც", - განაცხადა ლაშა თორდიამ.

ლაშა თორდიას უფლებამოსულება 25 ივლისს ეწურება, რომლის შემცვლელის დასახელება პარლამენტის თავმჯდომარეს, ირაკლი კობახიძეს მოუწევს. 

6 ივლისს, საქართველოს პარლამენტის თავმჯდომარემ განაცხადა, რომ გენერალური აუდიტორის კანდიდატურა შეიძლება ივლისში წარადგინოს.

11 ივლისს გავრცელდა ინფორმაცია იმის შესახებ, რომ მთავარი აუდიტორის პოსტზე ლაშა თორდია შესაძლოა ვანო ზარდიაშვილმა შეცვალოს. 

მაისში გავრცელდა ინფორმაცია, რომ გენერალური აუდიტორის თანამდებობაზე ხელისუფლების კანდიდტურა თბილისის მერი დავით ნარმანია იყო, რომელსაც მოქმედ პოზიციაზე ვადა ოქტომბერში ეწურება. 22 მაისს, ნარმანიამ ფაქტობრივად დაადასტურა, რომ მასთან გენერალურ აუდიტორად დანიშნის თაობაზე კონსულტაციები მიმდინარეობს, თუმცა პარლამენტის თავმჯდომარემ მოლაპარაკების ფაქტი უარყო.