მამუკა მდინარაძე: ერთი არგუმენტი ამართლებს მარტო ამ კანონის მიღებას - ნამახვანჰესის წინააღმდეგ კამპანია გახსოვთ? ყველას გვაქვს ინფორმაცია, რომ იყო რუსული ინტერესები, რომ ნამახვანჰესის მშენებლობას ხელი შეშლოდა

ერთი არგუმენტი ამართლებს მარტო ამ კანონის მიღებას - ნამახვანჰესის წინააღმდეგ კამპანია გახსოვთ? ყველას გვაქვს ინფორმაცია, რომ იყო რუსული ინტერესები, მიემართებოდა რუსული ძალიან მსხვილი ფინანსები იმისთვის, რომ ნამახვანჰესის მშენებლობას ხელი შეშლოდა, - ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ აგენტების ამერიკულ კანონპროექტზე საუბრისას განაცხადა.

მისი თქმით, ინფორმაციულად ფაქტობრივად ყველამ იცის, რომ ამ საკითხში რუსეთის და სხვა ქვეყნების ინტერესები იკვეთებოდა, თუმცა, დოკუმენტურად ეს დასაბუთებული არ არის, რადგან არ არსებობს კანონი, რომელიც დაფინანსების გამჭვირვალობას უზრუნველყოფდა.

„საზოგადოებას ემახსოვრება, რომ ჩვენი პარტნიორი ქვეყნებიდან და ამ ქვეყნების ორგანიზაციებიდან დაფინანსებული ენჯეო სექტორის წარმომადგენლებიც „ასაფორთებდნენ“ ამ კამპანიას. დოკუმენტზე ასახული არც ის მაქვს, რომ რუსეთიდან ფინანსდებოდა და არც ის, რომ ამ კამპანიისთვის ფინანსდებოდა ქართული ენჯეო, მაგრამ როდესაც ფურცელზე დაიწერება ეს ყველაფერი - კითხვას დასვამს ქართველი ადამიანი - რატომ ხდება, რომ რუსული ინტერესი, რომ ენერგოდამოუკიდებლობა ამ ქვეყნის არ არსებობდეს, ემთხვევა ჩვენი მეგობარი ქვეყნის რომელიღაცა ორგანიზაციისგან დაფინანსებული ენჯეო სექტორის წარმომადგენლის ინტერესს. დღეს რომ ხალხს ატყუებთ, რომ გამჭვირვალეა, უნდა წავიდეს ადამიანი, ჯერ შემოსავლებში მოიკითხოს, იქიდან რაღაც ივარაუდოს, მერე გრანტების შესახებ კანონის მიხედვით სადღაც წავიდეს და ასე უნდა იაროს და საბუღალტრო ექსპერტიზები ატაროს იმისთვის, რომ დაახლოებითი წარმოდგენა შეექმნას. საუბარია იმაზე, რომ უბრალოდ იყოს გამჭვირვალე საიდან იღებენ თანხას და რაში ხარჯავენ“, - განაცხადა მდინარაძემ.