ირაკლი კობახიძე ფადი ასლის განცხადებაზე: ეს არის უკიდურესად შემაშფოთებელი სატესტო გზავნილი. ის პირდაპირ სასწორზე აყენებს ერთ მხარეს ევროკავშირში კანდიდატის სტატუსის მიღებას და მეორე მხარეს აფხაზეთისა და სამაჩაბლოს დათმობას

ფადი ასლი არის „ნაცმოძრაობის“ და ფსევდოლიბერალების ერთ-ერთი გამორჩეული „პროპაგანდისტი“, ის ახმოვანებს იმ გზავნილებს, რომელთა გატესტვაც უნდა ხოლმე კოლექტიურ ნაცმოძრაობას. ეს არის უკიდურესად შემაშფოთებელი სატესტო გზავნილი. ის პირდაპირ სასწორზე აყენებს ერთ მხარეს ევროკავშირში კანდიდატის სტატუსის მიღებას და მეორე მხარეს აფხაზეთისა და სამაჩაბლოს დათმობას. როდესაც ასეთი ნარატივის შემოპარებას ცდილობს „ნაცმოძრაობა“, ეს არის უბრალოდ კატასტროფული მოვლენა - ასე აფასებს „ქართული ოცნების“ თავმჯდომარე ირაკლი კობახიძე ფადი ასლის განცხადებას.

მისი თქმით, სასწორზე ვერავითარ შემთხვევაში ვერ დადგება ერთ მხარეს ევროკავშირში კანდიდატიის სტატუსი და მეორე მხრივ, ტერიტორიული მთლიანობის აღდგენა, ეს არის დანაშაულებრივი განცხადებები.

“ჩვენ ვიცით, რომ ფადი ასლი თავისით არაფერს წერს. ის არის ნაცმოძრაობის და ფსევდოლიბერალების ერთერთ გამორჩეული „პროპაგანდისტი“. აქედან გამომდინარე, ის ახმოვანებს იმ გზავნილებს, რომელთა გატესტვაც უნდა ხოლმე კოლექტიურ ნაცმოძრაობას. ამ შემთხვევაში ეს არის უკიდურესად შემაშფოთებელი სატესტო გზავნილი. ის პირდაპირ სასწორზე აყენებს ერთ მხარეს ევროკავშირში კანდიდატის სტატუსის მიღებას და მეორე მხარეს აფხაზეთისა და სამაჩაბლოს დათმობას. როდესაც ასეთი ნარატივის შემოპარებას ცდილობს ნაცმოძრაობა, ეს არის უბრალოდ კატასტროფული მოვლენა.
მე მინდა ერთი რამე ვთქვა, რა თქმა უნდა, ჩვენი საგარეო პოლიტიკური პრიორიტეტი არის ევროკავშირში ინტეგრაცია, მაგრამ ჩვენთვის უმაღლესი ეროვნული ამოცანაა მშვიდობიანი გზით ტერიტორიული მთლიანობის აღდგენა და არავის მივცემთ უფლებას, რომ საზოგადოებას შეაპაროს ასეთი ნარატივი. სასწორზე ვერავითარ შემთხვევაში ვერ დადგება ერთ მხარეს ევროკავშირში კანდიდატიის სტატუსი და მეორე მხრივ, ტერიტორიული მთლიანობის აღდგენა, ეს არის უბრალოდ დანაშაულებრივი განცხადებები“ - განაცხადა ირაკლი კობახიძემ.

მისივე თქმით, ფადი ასლის ეს განცხადება 100-ზე მეტმა ფსევდოლიბერალმა ნაციონალმა მოიწონა, ისინი პირდაპირ აცხადებენ, რომ მზად არიან დათმონ აფხაზეთი და სამაჩაბლო კანდიდატის სტატუსის სანაცვლოდ.

„ერთი რამ მინდა კიდე შევნიშნო, ინფორმაცია გამომიგზავნეს იმასთან დაკავშირებით, რომ 100-ზე მეტმა ფსევდოლიბერალმა ნაციონალმა მოიწონა ფადი ასლის ეს განცხადება. მათ შორის არიან ნაცმოძრაობის აქტიური სახეები, როგორიც არის იგივე დავით დარჩიაშვილი, ერთერთი საზმაუში აირჩია „ნაცმოძრაობამ“ შავგულიძე-ბასილაია, თუ რაღაც ასეთი, აქტიური „ნაციონალი“ და ერთერთი არის ზურაბ გირჩი ჯაფარიძის ცოლი, რომელიც წლების მანძილზე საგარეო საქმეთა სამინისტროში მუშაობდა, რაც არის უბრალოდ, უბედურება. მათ გამოავლინეს საკუთარი სახე. ისინი პირდაპირ აცხადებენ, რომ მზად არიან დათმონ აფხაზეთი და სამაჩაბლო კანდიდატის სტატუსის სანაცვლოდ. ეს არის უბრალოდ კატასტროფა, საზოგადოებამ ძალიან მძიმედ უნდა შეაფასოს ეს განცხადება“ - განაცხადა ირაკლი კობახიძემ.

საერთაშორისო სავაჭრო პალატის ხელმძღვანელმა, ფადი ასლიმ სოციალურ ქსეილში დაწერა: „თეორიულად დავუშვათ, რომ რუსეთი ივანიშვილს აფხაზეთისა და სამხრეთ ოსეთის დაბრუნებას დაჰპირდა, კითხვა რომელიც თითოეულმა ქართველმა პატიოსნად უნდა დაუსვას საკუთარ თავს: მინდა გავერთიანდე ორ სეპარატისტულ რეგიონთან და ვიცხოვრო მათთან, როგორც რუსეთის მონამ,თუ მინდა ვიცხოვრო დამოუკიდებლად და თავისუფლად, როგორც ევროკავშირის წევრმა ამ ორი რეგიონის გარეშე?“.