ჯეჯელავამ ის გამოწვევები დაასახელა, რომლებიც ახალ მინისტრს დაუტოვა

განათლების ახალი მინისტრი მიხეილ ჩხენკელი უფლებამოსილების შესრულებას დღეიდან შეუდგა. მას სამინისტროში ყოფილმა მინისტრმა ალექსანდრე ჯეჯელავამ გადააბარა საქმე.

ახალ და ძველ მინისტრებს შორის გამართული შეხვედრის შემდეგ ჯეჯელავამ რამდენიმე გამოწვევა დაასახელა, რომელიც მიხეილ ჩხენკელს დაუტოვა.

"მთავარი გამოწვევა სოფლის და უმცირესობებით დაკომპლექტებულ სკოლებში კვალიფიციური მასწავლებლების ნაკლებობაა, განსაკუთრებით კი საბუნებისმეტყველო საგნებში. მეორე მთავარი გამოწვევა პროფესიულ სასწავლებლებში სტუდენტების სიმცირეა", - განაცხადა ჯეჯელავამ და ახალ მინისტრს რჩევებიც მისცა.

"მთავარი რჩევა იქნება მაქსიმალური კონცენტრაცია გრძელვადიან შედეგზე მოახდინოს", - თქვა ჯეჯელავამ.

პრემიერმინისტრის გადაწყვეტილებით, განათლებისა და მეცნიერების მინისტრის თანამდებობაზე ალექსანდრე ჯეჯელავა თსუ-ს პრორექტორმა მიხეილ ჩხენკელმა ჩაანაცვლა.

ახალმა მინისტრმა თქვა, რომ კონკრეტულ სამოქმედო გეგმას მოკლე ვადაში წარმოადგენს. მიხეილ ჩხენკელი ამბობს, რომ არის გამოწვევები, რომლებიც ეხება განათლებისა და მეცნიერების ხარისხის განვითარებას და სამინისტრო ყველაფერს გააკეთებს ამ პრობლემების გადასაწყვეტად.

რა არის ახალი მინისტრის მთავარ გამოწვევა? თემაზე განათლების საკითხების ექსპერტის, სკოლა „ჰამილტონის“ დირექტორის, გია მურღულიას მოსაზრებები ვრცლად  იხილეთ სტატიაში.