ოკუპირებულ სამხრეთ ოსეთში კვირიკაშვილის ინიციატივას ეხმაურებიან

ოკუპირებული სამხრეთ ოსეთის ე.წ. ხელისუფლება საქართველოს მთავრობის განცხადებას ეხმაურება აფხაზეთის და სამხრეთ ოსეთის ე.წ. საზღვრებთან სავაჭრო ურთიერთობების შესახებ. ცხინვალში მიაჩნიათ, რომ ურთიერთობის აღდგენა საქართველოს მიერ სამხრეთ ოსეთის დამოუკიდებლობის აღიარების შემდეგ გახდება შესაძლებელი.

პრემიერმინისტრ კვირიკაშვილის ინიციატივა “ოკუპაციის შესახებ კანონში“ შესწორებებს შეეხება, რომელიც საოკუპაციო ხაზთან ვაჭრობის წახალისებასაც გულისხმობს. მთავრობის ამ ინიციატივის შესახებ მინისტრმა ციხელაშვილმა 21 დეკემბერს ილაპარაკა.

ინიციატივას ოკუპირებული სამხრეთ ოსეთის ე.წ. საგარეო საქმეთა მინისტრი დიმიტრი მედოევი გამოეხმაურა და ამ იდეას გუშინდელი დღე უწოდა.

22 დეკემბერს პარლამენტში, ოპოზიციასთან შეხვედრისას პრემიერმინისტრმა ოკუპაციის შესახებ კანონში დაგეგმილ ცვლილებებსა და სოხუმთან და ცხინვალთან პირდაპირი მოლაპარაკების დაწყების სურვილის შესახებ განაცხადა. მან აღნიშნა, რომ საქართველოს მოქმედი ხელისუფლება კონფლიქტების მოგვარების მიმართულებით წინა ხელისუფლების „სტერეოტიპებისგან დისტანცირებას ახდენს“:

„პირდაპირ ვამბობ, რომ არ ვიზიარებთ „ნაციონალური მოძრაობის“ მიდგომას. ამაში დარწმუნდებით როგორც კი გაეცნობით „ოკუპირებული ტერიტორიების შესახებ კანონში“ ჩვენი მთავრობის მიერ მომზადებული ცვლილებების ახალ პროექტს. ეს დოკუმენტი შეიცავს ამ რეგიონებთან სავაჭრო ურთიერთობების განახლების პუნქტებსაც. შეგახსენებთ, არც ერთი კონფლიქტი პირდაპირი მოლაპარაკებების გარეშე არ მოგვარებულა“.

გარდა ამისა, პრემიერმა აღნიშნა, რომ ქართულ მხარეს ჟენევის საერთაშორისო დისკუსიების რანგის ამაღლება, კერძოდ, მათში არა მინისტრის მოადგილეების, არამედ სულ ცოტა მინისტრების ჩართვა სურს და მზად არის, რომ ამ ფორმატის მუშაობაში პირადადაც ჩაერთოს. ასევე მან თქვა, რომ ქართული მხარის „მოთხოვნა და თხოვნაა სტრატეგიული პარტნიორებისადმი, რომ ჟენევის მოლაპარაკებებს კონფლიქტის პოლიტიკური გადაჭრის მანდატი მიენიჭოს“.