„უცხოური გავლენის გამჭვირვალობის შესახებ“ კანონით გათვალისწინებული უფლებამოსილება სახელმწიფო აუდიტის სამსახურს ექნება - კანონში ცვლილებებზე პარლამენტში დღეს იმსჯელებენ

„უცხოური გავლენის გამჭვირვალობის შესახებ“ კანონით გათვალისწინებული უფლებამოსილება, საჯარო რეესტრის ეროვნული სააგენტოს ნაცვლად, სახელმწიფო აუდიტის სამსახურს ექნება - შესაბამისი ცვლილებები, „უცხოური გავლენის გამჭვირვალობის“ შესახებ საკანონმდებლო პაკეტში შედის, რომელზე მსჯელობაც პარლამენტში დღეს იწყება.

ცვლილებებს დეპუტატები პირველი მოსმენით იურიდიულ საკითხთა კომიტეტის სხდომაზე განიხილავენ. პროექტის ინიციატორთა განმარტებით, გარე ძალებთან დაკავშირებული სუბიექტების ეფექტიანი აღრიცხვისა და მონიტორინგისთვის მიზანშეწონილია, ერთ სფეროსთან დაკავშირებული საჯარო მმართველობითი ფუნქციები ერთმა კონკრეტულმა კონსტიტუციურმა ორგანომ აიღოს. სწორედ სახელმწიფო აუდიტის სამსახურია ის, ვინც გრანტის გაცემისა და მიღების მონიტორინგს ეწევა, ასევე აქვს ამერიკული FARA-ს ზუსტი ქართული ანალოგით გათვალისწინებული უფლებამოსილებები.

„არასამთავრობო და მედიაორგანიზაციებს საჯარო რეესტრში უნდა გაევლოთ რეგისტრაცია და ცვლილებების შემდეგ ამას აუდიტის სამსახური გააკონტროლებს. აქვე აღნიშნულია, რომ ის ორგანიზაციები, რომელთა საზღვარგარეთიდან შემოსავლები 20%-ზე მეტია, უნდა დარეგისტრირდნენ. ეს ცვლილება გათვალისწინებულია იმიტომ, რომ უფრო გამჭვირვალე, ეფექტური და მოქნილი გახდეს ყველაფერი“, - აცხადებს ფრაქცია „ქართული ოცნების“ თავმჯდომარის მოადგილე რიმა ბერაძე.