ფინანსთა მინისტრი ტელეკომპანია "იბერიაზე“ ზეწოლას გამორიცხავს

ფინანსთა მინისტრი ტელეკომპანია „იბერიასა“ და მის დამფინანსებელზე რაიმე სახის ზეწოლას გამორიცხავს. როგორც მამუკა ბახტაძემ განაცხადა, თითოეული ქართული საწარმო ძალიან მნიშვნელოვანია.

"მინდა ყველას შევახსენო, რომ ზოგადად სააქციზო საქონლის და ამ შემთხვევაში თამბაქო, არის ყველაზე მსხვილი კონტრიბუტორი ჩვენი ბიუჯეტისთვის და მე პირადად ეს ძალიან ტექნიკური თემა მგონია საგადასახადო ნაწილში, ნებისმიერი თამბაქოს და არათამბაქოს მწარმოებელი კომპანიის ურთიერთობა სახელმწიფოსთან. რაც შეეხება თავისუფალ მედიას, ვფიქრობ პრემიერმა ძალიან დეტალური განმარტება გააკეთა, თავისუფალი მედია არის ერთ-ერთი მთავარი მონაპოვარი ჩვენი ხელისუფლების, ჩვენ ძალიან მნიშვნელოვანი პროგრესი გვაქვს ამ მიმართულებით. მინდა ყველას შევახსენო, რომ ის რაოდენობა მედიის რაც ქვეყანაში არსებობს არის ძალიან კარგი, შეესაბამება იმას საითკენაც საქართველო მიისწრაფვის, ევროპისკენ“, - განაცხადა მამუკა ბახტაძემ.

შეკითხვაზე გამორიცხავს თუ არა ის ბიზნესზე ზეწოლას მინისტრმა განაცხადა, რომ გამორიცხავს,

"გამოვრიცხავ ნებისმიერი ტიპის ზეწოლას, ნებისმიერი ტიპის საგადასახადო ინსტრუმენტების გამოყენებით. ბიზნესის თავისუფლება არის ძალიან მნიშვნელოვანი ღირებულება, ძალიან მნიშვნელოვანი მონაპოვარი და საგადასახადო ორგანოებთან თანამშრომლობა არის ძალიან გამჭვირვალე, თამაშის წესები არის საერთო ყველასთვის“ - განაცხადა მამუკა ბახტაძემ.

მანამდე პრემიერმინისტრმა ხელისუფლების მხრიდან კონკრეტულ მედიასაშუალებებზე ზეწოლის შესახებ ინფორმაციას „სრული აბსურდი“ უწოდა. 

გუშინ საღამოს ტელეკომპანია "იბერიის" ჟურნალისტების სახელით ეთერში განცხადება წაიკითხა ტელეკომპანიის ჟურნალისტმა ვახო ხუზმიაშვილმა.

ჟურნალისტის განცხადებით, ტელეკომპანიას ფინანსურ პრობლემები აქვს. რაც მათი ვარაუდით მიზანმიმართულად ხდება, რათა ტელევიზიამ ვეღარ გააგრძელოს მაუწყებლობა თავისუფალი სარედაქციო პოლიტიკით. 

“ტელეკომპანია იბერიას მთავარი დამფინანსებელი არის ომეგა ჯგუფი და მასში შემავალი კომპანიები, რომელიც სერიოზული ფინანსური დარტყმის ქვეშ აღმოჩნდა. კომპანია ომეგა დღესაც დემპინგის მსხვერპლია, რაც ტელეკომპანია იბერიას სერიოზულ ფინანსურ პრობლემებს უჩენს. არხზე მომუშავე ჟურნალისტები ვვარაუდობთ, რომ ეს ხდება მიზანმიმართულად იმისთვის, რომ ტელეკომპანიამ ვეღარ გააგრძელოს მაუწყებლობა თავისუფალი სარედაქციო პოლიტიკით. ტელეკომპანია იბერია არის ტელევიზია,რომელიც ყველა ხელისუფლების პირობებში ხდება მიუღებელი და დევნის ობიექტი დამოუკიდებელი სარედაქციო პოლიტიკის გამო. ჩვენ, ჟურნალისტები მოვუწოდებთ ხელისუფლებას აღკვეთოს ომეგა ჯგუფის წინააღმდეგ მიმართული უკანონო ქმედბეები. ”, – განაცხადა ვახო ხუზმიაშვილმა.