გუდაურის საბაგიროს მწარმოებელი კომპანია: ასეთი რამ ბოლო 20 წელია არ მომხდარა

გუდაურში დამონტაჟებული საბაგიროს მწარმოებელი კომპანია Doppelmayr-ის წარმომადგენელი ეკარდ ასმანი ამბობს, რომ დღევანდელი ინციდენტის მიზეზებთან დაკავშირებით, ჯერ სრულყოფილი ინფორმაცია არ აქვს. ამის შესახებ 1tv წერს.

როგორც მან განაცხადა, Doppelmayr-ის წარმომადგენელი გუდაურში უკვე მიემგზავრება.

"მივიღეთ ინფორმაცია, ვნახეთ ვიდეოები. ახლა ზუსტად არ შეგვიძლია ვთქვათ, რა მოხდა. ჩვენი კოლეგა Doppelmayr-იდან უკვე მიდის გუდაურში. დაახლოებით ერთ საათში იქნება ადგილზე. მიზეზებთან დაკავშირებით არ გვაქვს დამატებითი ინფორმაცია. საბედნიეროდ, საბაგირო გზებზე ინციდენტები იშვიათია. პირადად, ბოლო 20 წლის პერიოდში არ მახსოვს ასეთი ინციდენტი. ამ ეტაპზე, არ გვაქვს სრულყოფილი ინფორმაცია ინციდენტზე, მაგრამ ვმუშაობთ ამ საკითხზე“, – ამბობს ასმანი, რომელსაც პირველი არხი ვენაში დაუკავშირდა.

ავსტრიულ-შვეიცარიული კომპანია Doppelmayr 1892 წელს დაარსდა და საბაგიროების უმსხვილესი მწარმოებელია.

გუდაურში უბედური შემთხვევა დღეს მოხდა. ყაზბეგის მერის ალექსანდრე ზაგაშვილის ინფრომაციით, ძაბვის ვარდნის შედეგად ელექტროენერგია გაითიშა, რის გამოც საბაგირო ავარიულად გაჩერდა, შემდეგ კი საძელე საბაგიროზე სავარძლები ერთმანეთს შეეჯახნენ.

ენერგოპრო ჯორჯიაში" აცხადებენ, რომ გუდაურის ზონაში ძაბვის გათიშვა ან ძაბვის პარამეტრების რაიმე სახის ცვლილება არ მომხდარა.

მცხეთა-მთიანეთში სახელმწიფო რწმუნებულის, ლევან ზაუტაშვილის ინფორმაციით, გუდაურში საბაგირო და მისი ყველა პარამეტრი შემოწმებული იყო. მისი თქმით, დღის პირველ ნახევარში მწყობრიდან გამოვიდა საბაგირო და ამის შედეგად დაშავდნენ ტურისტები. 

შინაგან საქმეთა სამინისტრომ მომხდარ ფაქტთან დაკავშირებით გამოძიება საქართველოს სსკ-ს 275-ე მუხლით დაიწყო, რაც რკინიგზის, წყლის, საჰაერო ან საბაგირო ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

საქართველოს პირველივიცე პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი გუდაურში გაემგზავრა, სადაც დღეს, პირველადი ინფორმაციით, სათხილამურო ტრასაზე, საბაგირო ავარიულად გაჩერდა და უკუსვლით ამოძრავდა.

გუდაურში მძიმედ დაშავებული კიდევ ერთი პაციენტი თბილისში ღუდუშაურის სახელობის საავადმყოფოში გადმოჰყავთ. ცნობილია, რომ ქალი ორსულადაა და ის სხვა ქვეყნის, კერძოდ კი, შვედეთის მოქალაქეა. როგორც გაირკვა, ისიც ვერტმფრენით მოჰყავთ.

თბილისში გადმოჰყავთ ასევე უკრაინელი კაცი, რომელიც მძიმედაა დაშავებული.

ჯანდაცვის მინისტრის, დავით სერგეენკოს ინფორმაციით, გუდაურის საბაგიროზე მომხდარი შემთხვევის შედეგად დაშავებულ შვედეთის მოქალაქეს, რომელიც ორსულადაა, აღენიშნება ტკივილები წელის არეში, უკრაინის მოქალაქეს კი ხელის ღია მოტეხილობა აქვს. 

სოციალურ ქსელში გუდაურში მომხდარის ამსახველი რამდენიმე ვიდეო ვრცელდება.