ხიდაშელი: დღეს საქართველო ომშია

"ქვეყნის მოქალაქეეებმა და ხელისუფლებამ უნდა გაისიგრძეგანოს, რომ ომში ვართ და შესაბამისად, -  ადეკვატურად უნდა მოვიქცეთ"-, ამის შესახებ თავდაცვის ყოფილმა მინისტრმა თინა ხიდაშელმა წილკანში ისაუბრა. მან არჩილ ტატუნაშვილის ოჯახს სამძიმარი გამოუცხადა და საოკუპაციო რეჟიმის მხრიდან მომავალ საფრთხეებზე გაამახვილა ყურადღება.

"ძალიან რთულია რაიმე რეცეპტი გამოწერო, - როგორ უნდა დაიცვა ყოველი მოქალაქე. მთავარი ამ შემთხვევაში ისაა, რომ გაცნობიერებული გქონდეს: ტატუნაშვილი ომის პირობებში მოკლეს, რომ დღეს საქართველო ომშია. სანამ ქვეყნის მოქალაქის მხრიდან ამის ბოლომდე გაცნობიერება არ მოხდება, იგნორირებით საფრთხე არ მცირდება, პირიქით, ის იზრდება.

თუ ამ რეჟიმში ვართ, თუ გაცნობიერებული გვაქვს, რომ ომის პირობებში ვიმყოფებით, მაშინ მოქალაქეც და ხელისუფლებაც სხვანაირად იქცევა, უფრო მაღალი გაქვს სიფრთხილის განცდაც. ვფიქრობ, რომ მთავარი შეცდომა, რომელსაც საქართველოს ხელისუფლება უშვებს დღეს, სწორედ ეს არის: ჩვენ ძალიან ხშირად ვართ ვითარებაში, როცა გიჩნდება განცდა, რომ რაღაც სხვა ქვეყანაზე საუბრობენ, რომ აქ რუსის ჯარი აღარ არის, რომ აქვე ოკუპანტი არ საქმიანობს ზუსტად ისე, როგორც მას მოსკოვიდან უკვეთავენ" - თქვა ხიდაშელმა.

პოლიტიკოსებთან ერთად, დღეს წილკანში სრულიად საქართველოს კათოლიკოს-პატრიარქიც ჩავიდა. ილია მეორემ არჩილ ტატუნაშვილის ოჯახს მიუსამძიმრა.

არჩილ ტატუნაშვილს ხვალ მუხათგვერდის ძმათა სასაფლაოზე სამხედრო პატივით დაკრძალავენ. თავდაპირველად გავრცელებული ინფორმაციით, არჩილ ტატუნაშვილი 24 მარტს ქანდას სასაფლაოზე უნდა დაეკრძალათ.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის სუნთქვის უკმარისობით გარდაიცვალა. 

ტატუნაშვილის ცხედარი ქართული მხარის მიერ კონტროლირებად ტერიტორიაზე 20 მარტს  გადმოასვენეს.