ჯგერენაია: გამოძიების შემდეგ დადგინდება, შეიძლებოდა თუ არა ფაქტის თავიდან აცილება

ტყიბულში იმყოფება საქართველოს ჯანდაცვის სამინისტროს შრომისა და დასაქმების პოლიტიკის დეპარტამენტის უფროსი, ელზა ჯგერენაია. მისი განცხადებით, სპეციალური ჯგუფი უკვე ემზადება შემთხვევის ადგილის შესასწავლად.

"სხვა საგამოძიებო ჯგუფთან ერთად, კონკრეტული ადგილის შესწავლის შემდეგ, სადაც უბედური შემთხვევა მოხდა, გამოძიებს დადებს უფრო ობიექტურ სურათს, თუ რა მოხდა რეალურად.​ პირველადი ინფორმაციით, ფაქტის გამომწვევი მიზეზი სამთო დარტყმაა, თუმცა ეს ფაქტი არ გამორიცხავს, რომ უსაფრთხოების ნორმების დაცვას არ შეეძლო ფაქტის თავიდან აცილება“,- განაცხადა ჟურნალისტებთან ელზა ჯგერენაიამ.

ჯგერენაიამ ასევე განაცხადა, რომ ივნისში შემოწმდა მინდელის შახტა. მაშინ გარკვეული დარღვევები აღმოჩნდა, აღჭურვა, უსაფრთხოების წესების დაცვა - იყო გარკვეული შენიშვნები. ნაწილობრივ გამოსწორდა კომპანიის მხრიდან. განხორციელდება დაუგეგმავი ვიზიტები საწარმოში.

მინდელის შახტში ტრაგედია დილით, დაახლოებით 4 საათზე მოხდა. დაშავებული მუშეები საავადმყოფოში გადაიყვანეს. 

მომხდარზე გამოძიება დაიწყო საქართველოს სსკ-ის 240-ე მუხლის მეორე ნაწილით, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს. დანაშაული 5 წლამდე თავისუფლების აღკვეთას ითვალისწინებს.

2018 წლის გასულ სამ თვეში საწარმოო უბედური შემთხვევების შედეგად, (სხვადასხვა სფეროებში), ქვეყნის მასშტაბით, სამუშაო ადგილზე დაიღუპა 18 ადამიანი და მძიმედ დაშავდა 12. ამის შესახებ imedinews-ს პროფესიული კავშირების გაერთიანებაში უთხრეს.

პარლამენტმა შრომის უსაფრთხოების შესახებ კანონი 7 მარტს მიიღო.