კათოლიკე მრევლს ბუზმარეთის სადავო ეკლესიამდე მანქანებით მისვლაზე უარი უთხრეს

10 მაისს კათოლიკური სამყარო მაცხოვრის ამაღლებას ზეიმობს. ამ დღესთან დაკავშირებით, ხალციხესა და ადიგენში მცხოვრები კათოლიკეები ბუზმარეთის ეკლესიაში მიდიან, რომელიც საქართველოსა და თურქეთს შორის ნეიტრალურ ტერიტორიაზე მდებარეობს. როგორც გამოცემა "სამხრეთის კარიბჭე" წერს, დღეს მრევლს სასაზღრო გამშვებ პუნქტზე არ ატარებდნენ, ამის მიზეზად კი მებაჟეები იმას ამბობდნენ, რომ მრევლის სატვირთო მანქანა ნაწვიმარზე გზას დააზიანებდა.

მრევლის თქმით, მეზაღვრეებმა მავთულხლართებს იქით, მხოლოდ ორი მანქანა გაატარეს, რომლებშიც სასულიერო პირები ისხდნენ. საზღვრიდან ტაძრამდე, დაახლოებით, ოთხ კილომეტრზე კი სასაზღრო პოლიციის თანამშრომლებმა მრევლს მანქანებით გადაადგილების საშუალება არ მისცეს: "გვითხრეს, თუ გინდათ ფეხით წადით, მანქანებით ვერ შეგიშვებთ, ნაწვიმარია და გზა გაფუჭდება, მერე ჩვენ ვეღარ ვივლითო", - ამბობს მრევლი.

მრევლის ნაწილი ერთი სატვირთო მანქანით იყო, ნაწილი კი მსუბუქი მანქანებით.

ბუზმარეთის ეკლესია მართლმადიდებლებსა და კათოლიკეებს შორის სადავო ძეგლია. კათოლიკური ეკლესია ამბობს, რომ ტაძარი მათია და 2007 წელს რესტავრაციაც ჩაატარეს. მართლმადიდებელი ეკლესია კი აცხადებს, რომ ეკლესია მათ ეკუთვნით და 10 წლის წინ იქ მამათა მონასტერიც დააარსეს.

კათოლიკე მრევლმა ბუზმარეთის მონასტერში ართლმადიდებელ ბერებს წირვის ტაძარში ჩატარების ნებართვა სთხოვა, თუმცა, ვერ მიიღეს. როგორც მამათა მონასტერში თქვეს: "ეს მართლმადიდებლური ტაძარია და კანონიკის მიხედვით კათოლიკეებს არ აქვთ უფლება, რომ იქ წირვა აღავლინონ".

კათოლიკე სასულიერო პირებმა და მრევლმა ამაღლების სადღესასწაულო წირვა ტაძრის მიმდებარედ ტყეში აღავლინეს.