მაიკ პომპეომ კონგრესის წინაშე ნატოში საქართველოს გაწევრიანების აუცილებლობაზე განაცხადა

აშშ-ის სახელმწიფო მდივანმა მაიკ პომპეომ აშშ-ის კონგრესის საგარეო ურთიერთობათა კომიტეტზე კიდევ ერთხელ დააფიქსირა მისი პოზიცია, რომ საქართველო ნატოს წევრი ქვეყანა უნდა გახდეს. ეს პასუხი იყო რესპუბლიკელი სენატორის ჯო უილსონის შეკითხვაზე იმასთან დაკავშირებით, თუ რა უნდა გააკეთოს აშშ-მ რუსეთის აგრესიის შესაკავებლად, რომელიც ბოლო წლების განმავლობაში განსაკუთრებით გააქტიურდა საქართველოში, უკრაინასა და მოლდოვაში. ამის შესახებ 1tv წერს.

"ამ სამი ქვეყნის შეიარაღების საკითხებს სიამოვნებით გავეცნობი უფრო დეტალურად. ამ კვირაში საქართველოს პრემიერმინისტრთან სახელმწიფო დეპარტამენტში, სტრატეგიული პარტნიორობის ფარგლებში დიალოგი გვქონდა. თავიდანვე მსურს, მკაფიოდ განვაცხადო, რომ საქართველოსთან მიმართებით ვმუშაობთ ნატო-ში გაწევრიანებაზე. ეს ის საკითხებია, რომლითაც შეგვიძლია, დავეხმაროთ ამ ქვეყნების მოსახლეობას. გასულ წელს ასევე მივიღეთ გადაწყვეტილება, რომ უკრაინისთვის იარაღი და სისტემები მიგვეწოდებინა, რასაც ამჟამად იყენებენ. ბევრი რამ დარჩა გასაკეთებელი იმ ყოფილი საბჭოთა ქვეყნების წარმოჩინებისთვის, რომლებიც დასავლეთის გზას ადგანან", – განაცხადა აშშ-ის სახელმწიფო მდივანმა მაიკ პომპეომ.

შეგახსენებთ, რომ საქართველოს პრემიერმინისტრი გიორგი კვირიკაშვილი და აშშ-ის სახელმწიფო მდივანი მაიკ პომპეო ერთმანეთს 21 მაისს შეხვდენენ. როგორც შეხვედრის შემდეგ მათ მედიისთვის განცხადებები გააკეთეს.