კობა დავითაშვილი სააკაშვილის წინააღმდეგ საქმის წარმოების დაწყებას ითხოვს

პარლამენტის ყოფილი წევრი კობა დავითაშვილი ექსპრეზიდენტ მიხეილ სააკაშვილის წინააღმდეგ საგამოძიებო უწყებებს საქმის წარმოების დაწყებას სთხოვს. ინფორმაციას 1tv ავრცელებს.

კობა დავითაშვილის განცხადებით, მიხეილ სააკაშვილმა 1 ივლისს, "რუსთავი 2"-თან ინტერვიუში, პირდაპირ ეთერში აღიარა, რომ სწორედ მისი და ვანო მერაბიშვილის ინიციატივით ჩაწერეს კობა დავითაშვილი ფარულად.

„მაშინდელი კანონმდებლობა კრძალავდა პარლამენტის წევრის ჩაწერას საერთოდ. ამიტომ სააკაშვილმა მაშინ მოიგონა ტყუილი, რომ მე სახელმწიფომ კი არა, არამედ იმ სუფრის მოანაწილე ერთ-ერთმა პირმა ჩამწერა, რომელიც ძალიან მოკლე ხანში გარდაიცვალა გაურკვეველ ვითარებაში. სააკაშვილს ეს ყველაფერი დაავიწყდა და მერაბიშვილსაც დაადო ხელი. განაცხადა, რომ მერაბიშვილმა დაურეკა და უთხრა, კობა დავითაშვილს პოლიტიკურ გვამად ვაქცევ, ასეთი იდეაო მომივიდაო. ჩანაწერი გაკეთებული იყო ბევრად გვიან, თავდასხმის ფაქტის შემდეგ. ეს არის სისხლის სამართლის დანაშაული, რომელიც ექსპრეზიდენტმა პირდაპირ ეთერში აღიარა და ხელი დაადო ვანო მერაბიშვილს. მოვითხოვ ან შსს-მ, ან პროკურატურამ, თავად გადაწყვიტონ რომელმა, დაუყონებლივ დაკითხონ ამ საქმეზე ვანო მერაბიშვილი, დაიწყოს გამოძიება სააკაშვილის მიმართ, ხელისუფლების ბოროტად გამოყენების გამო, რაც პარლამენტის წევრის მიმართ უკანონო დევნაში მდგომარეობდა“, - აცხადებს კობა დავითაშვილი.

ტელეკომპანია „რუსთავი 2“-ის ეთერში მიხეილ სააკაშვილს გადაცემის წამყვანმა ნიკა გვარამიამ, რომელიც მაშინ გენერალური პროკურორის მოადგილე იყო, სააკაშვილის პრეზიდენტობის დროს დეპუტატებზე განხორციელებული თავდასხმების საქმეების გამოძიების შესახებ ჰკითხა.

კერძოდ, საუბარი შეეხო 2006 წლის ივნისში კობა დავითაშვილზე თავდასხმას, რაზეც სააკაშვილმა თქვა, რომ რუსული სპეცსამსახურები დავითაშვილის მოკვლას გეგმავდნენ. სააკაშვილს თქმით, მასთან ზურაბ ადეიშვილი და ვანო მერაბიშვილი მივიდნენ და უთხრეს, რომ კობა დავითაშვილის მოკვლა იგეგმებოდა.

„კობა დავითაშვილი გამოვიდა და სიბინძურეები ილაპარაკა ჩემზე და ჩემს ოჯახზე. ამის შემდეგ, მოხდა ეს ცნობილი ჩანაწერი. მაშინ ვიყავი ჩინეთში ვიზიტით, ვანო მერაბიშვილს ველაპარაკებოდი სხვადასხვა თემაზე და მეუბნება, რომ იცოდე, კობა დავითაშვილი, ჩათვალე რომ მკვდარია. პოლიტიკურად მკვდარიაო, თუ არადა ნახავო, მალე მოკვდებაო, ახლა ყველაფერს ვერ გეტყვიო. ეს რომ მითხრა, ეგრევე დავუკიდე. ჩინეთში ვიყავი, რუსები ყველაფერს იწერდნენ. მერე იყო ცნობილი ისტორია, ორი კვირის შემდეგ, კობა დავითაშვილმა განაცხადა, რომ ჩემი მოკვლა სცადესო. ბევრჯერ ამბობდნენ ასეთ სისულელეებს და არ ვაქცევდი ყურადღებას რუსებმა გამოაგზავნეს კურტაევი, მახსოვს, ჰქონდათ ეს ჩანაწერი, ჰქონდათ ის ფაქტი, რომ მას ჩემზე ჰქონდა ნალაპარაკევი და შემთხვევით გადარჩა. "ეფესბემ" გამოაგზავნა კურტაევი დავითაშვილის მოსაკლავად და რომ მოეკლა დავითაშვილი, ვის დავუმტკიცებდი, რომ არაფერი კავშირი არ მაქვს დავითაშვილის მკვლელობასთან. ასეთი მეთოდებით მუშაობდნენ ჩვენ წინააღმდეგ“, - განაცხადა მიხეილ სააკაშვილმა. 

კობა დავითაშვილს 2006 წლის ივნისში, მისსავე სახლთან დაესხნენ თავს. შედეგად პოლიტიკოსის მეზობელი დაიჭრა. თავდასხმის საქმე შსს მალევე გახსნა და განაცხადა, რომ თავდამსხმელი 1981 წლის 23 ივნისს დაბადებული, რუსეთის მოქალაქე გიორგი კურტაევი იყო.