კობა დავითაშვილმა სააკაშვილს და მერაბიშვილს პროკურატურაში უჩივლა

პარლამენტის ყოფილმა წევრმა კობა დავითაშვილმა მიხეილ სააკაშვილისა და ვანო მერაბიშვილის წინააღმდეგ საქმის აღძვრის მოთხოვნით პროკურატურას მიმართა. ინფორმაციას 1tv ავრცელებს.

კობა დავითაშვილის განცხადებით, მიხეილ სააკაშვილმა 1 ივლისს, "რუსთავი 2"-თან ინტერვიუში, პირდაპირ ეთერში აღიარა, რომ სწორედ მისი და ვანო მერაბიშვილის ინიციატივით ჩაწერეს კობა დავითაშვილი ფარულად. დავითაშვილის თქმით, "ოპერატიულ-სამძებრო საქმიანობის შესახებ" კანონის თანახმად დეპუტატის ფარული მიყურადება აკრძალულია. სწორედ ამის გამო, ყოფილი დეპუტატი ითხოვს, რომ გამოძიება დაიწყოს სააკაშვილისა და მერაბიშვილის მიერ უფლებამოსილების ბოროტად გამოყენების მუხლით.

„მოვითხოვე მიხეილ სააკაშვილისა და მერაბიშვილის მიმართ გამოძიება დაიწყოს მათი მხრიდან ხელისუფლების ბოროტად გამოყენების ფაქტზე, რაც, პრაქტიკულად, მან აღიარა „რუსთავი 2“-ის ეთერში, როდესაც გაანდო საზოგადოებას, რომ ის ფარული ჩანაწერი, რომლის გაკეთებაც აკრძალული იყო, პარლამენტის წევრის მიმართ კანონის თანახმად განხორციელდა მასთან შეთანხმებით მერაბიშვილის მიერ, რომელმაც ახარა სააკშვილს, რომ დავითაშვილს პოლიტიკურ გვამად აქცევდნენ. მადლობა მინდა ნიკა გვარამიას გადავუხადო. მან მრავალი წლის დაგვიანებით გაიხსენა, რომ ოდესღაც პროკურორის მოადგილე იყო და ეთერში დაჰკითხა მიხეილ სააკაშვილი. ჩემს მიმართ იმდენი უბედურება მოხდა, ერთმანეთში ერევა ყველას. სამი თავდასხმა, ერთი მკვლელობის მცდელობა. ამაზე არ აღძრულა საქმე. მაშინ ეს ყველაფერი გაფორმდა როგორც სუფრის წევრის პირადი მასალა, რომელმაც მიაწოდა მედიას ჩანაწერი. ეს ადამიანი ავარიაში გარდაიცვალა. მე ამ გარემოებების გამოძიებასაც მოვითხოვ. ვფიქრობ, მოწმე სააკაშვილის ხელისუფლებამ მოიშორა. ვითხოვ გამოძიებას იმ საქმეზე, რაც აქამდე არ ყოფილა. მაშინ მოქმედი „ოპერატიულ-სამძებრო საქმიანობის შესახებ“ კანონის მიხედვით არ შეიძლებოდა ჩანაწერის მომზადება. მათ კონფიდენტის მეშვეობით გაავრცელეს „რუსთავი 2“-ის ეთერში ჩემი პოლიტიკური მკვლელობის მიზნით. ეს უკანონო მიყურადება იყო“, – განაცხადა კობა დავითაშვილმა.

ტელეკომპანია „რუსთავი 2“-ის ეთერში მიხეილ სააკაშვილმა ისაუბრა 2006 წლის ივნისში კობა დავითაშვილზე თავდასხმის შესახებ, რაზეც სააკაშვილმა თქვა, რომ რუსული სპეცსამსახურები დავითაშვილის მოკვლას გეგმავდნენ. მან ვიდეოჩანაწერიც ახსენა, რომელშიც მისი თქმით, დავითაშვილი მის ოჯახს შეურაცხყოფას აყენებს. 

2006 წლის ოქტომბერში გამოქვეყნდა ფარული ვიდეო ჩანაწერი სადაც დავითაშვილი ალადინ მირზაევს ფულის გადახდის სანაცვლოდ პარტიულ სიაში გამსვლელ ადგილს დაჰპირდა. ვიდეოში ჩანს, რომ ამ ადამიანმა 20 ათასი დოლარი გადასცა, რაზეც დავითაშვილმა თქვა: "ძალიან კარგია". უპარტიო ალადინ მირზაევს რესპუბლიკური და კონსერვატორული ბლოკის საარჩევნო სიაში მე–5 ადგილი ეკავა, თუმცა ბლოკმა თბილისის საკრებულოში მხოლოდ ერთი დეპუტატი – კობა დავითაშვილი – გაიყვანა. 

კობა დავითაშვილს 2006 წლის ივნისში, მისსავე სახლთან დაესხნენ თავს. შედეგად პოლიტიკოსის მეზობელი დაიჭრა. თავდასხმის საქმე შსს მალევე გახსნა და განაცხადა, რომ თავდამსხმელი 1981 წლის 23 ივნისს დაბადებული, რუსეთის მოქალაქე გიორგი კურტაევი იყო.