ვინ არიან სიაში, რომელიც ოკუპირებულ აფხაზეთში ოთხოზორია-ტატუნაშვილის სიის საპირისპიროდ შექმნეს

ოკუპირებულ სოხუმში ადგილობრივმა აქტვისტებმა ორგანიზაციიდან „არუაა“ აფხაზეთის დე ფაქტო პარლამენტის და მთავრობის სახელზე მიმართვა გამოაქვეყნეს და მათ „ოთხოზორია-ტატუნაშვილის“ სიის საპასუხოდ საქართველოს მოქალაქეების „შავი სიის“ მიღებას სთავაზობენ. „არუუა“-მ, რომელიც პოზიციონირებს როგორც „აფხაზეთის ხალხის 1992-1993 წლების სამამულო ომის ვეტერანთა საზოგადოებრივი ორგანიზაცია“, თავის „დოკუმენტს“ „ქართული სპეცსამსახურბის მიერ მოკლული და მოტაცებული ადამიანების პატივსაცემად“ „ხიშბა-სიგუას სია“ უწოდა.   

სიაში 26 ადამიანია. მათ შორის ყოფილი ქართველი მაღალჩინოსნებიც:

„1. ახალაია ბაჩო - საქართველოს თავდაცვის ყოფილი მინისტრი
2. ახალაია სოსო - ოკუპაციური საოკუპაციო პოლიციის ყოფილი ხელმძღვანელი
3. ბათიაშვილი ირაკლი - საქართველოს უშიშროების ყოფილი მინისტრი
4. ბიგვავა სლავიკი - დევერსიულ-ტერორისტული ჯგუფის „ტყის ძმების“ ლიდერი
5. ბულისკერია ავთონდილი - დივერსიულ-ტერორისტული ჯგუფის წევრი
6. გამისონია რობერტი - დივერსიულ-ტერორისტული ჯგუფის წევრი
7 გოგავა ზაზა - ბრიგადის გენერალი, საქართველოს შეიარაღებული ძალების გაერთიანებული შტაბის ყოფილი ხელმძღვანელი.
8. გოლანძია ბეჟანი - საქართველოს შსს-ს თანამშრომელი
9. ირაკლი ოქრუაშვილი - საქართველოს თავდაცვის ყოფილი მინისტრი
10. კაკულია ზაზა - საქართველოს შსს-ს თანამშრომელი 
11. ქარდავა მეგისი - საქართველოს თავდაცვის სამინისტროს ყოფილი თანამშრომელი
12. ყარყარშვილი გიორგი
13. კეზერაშვილი დავითი - საქართველოს თავდაცვის მინისტრი 2008 წელს
14. თენგიზ კიტოვანი - საქართველოს თავდაცვის ყოფილი მინისტრი
15. მამუკა ყურაშვილი - ბრიგადის გენერალი, საქართველოს შეიარაღებული ძალების გაერთიანებული შტაბის სამშვიდობო კონტიგენტის ოპერაციების ხელმძღვანელი  
16. ლაკაევი იუსუფი - ტერორისტი
17. მერაბიშვილი ვანო - საქართველოს შს ყოფილი მინისტრი
18. ნიორაშვილი დავითი - ბრიგადის გენერალი, საქართველოს შეიარაღებული ძალების შტაბის უფროსის მოადგილე. 2008 წლის ომისთვის დაჯილდოებულია „წმინდა გიორგის“ უმაღლესი ორდენით 
19. ფონიავა ემზარი - დივერსიულ-ტერორისტული ჯგუფის წევრი
20. სააკაშვილი მიხეილი - საქართველოს ყოფილი პრეზიდენტი
21. სამუშია ალიკი - დივერსიულ-ტერორისტული ჯგუფის წევრი
22. თოფურია ბესიკი - საქართველოს შსს-ს თანამშრომელი
23. ხარჩილავა ომარი - დივერსიულ-ტერორისტული ჯგუფის წევრი
24. ჩანგელია მანუჩარი - საქართველოს შსს-ს ყოფილი თანამშრომელი
25. შამათავა რომანი - საქართველოს შსს-ს ყოფილი თანამშრომელი
26. შენგელია დავითი - დივერსიულ-ტერორისტული ჯგუფის „ტყის ძმების“ ლიდერი"

„არუუა“ აფხაზეთის დეფაქტო ხელისუფლებას ამ სიის უახლოეს მომავალში განხილვას სთხოვს და პროექტს ქართული მხარის ქმედებებზე იძულებით პასუხს უწოდებს.   

ოთხოზორია-ტატუნაშვილის სიაში 33 პირი მოხვდა. ამ ფაქტს ოკუპირებული აფხაზეთის რეჟიმი 27 ივნისს გამოეხმაურა და საქართველოს მთავრობის ქმედებას დესტრუქციული უწოდა.

2017 წლის 5 მარტს პარტია „ევროპულმა საქართველომ“ საპარლამენტო უმრავლესობას არჩილ ტატუნაშვილთან დაკავშირებით რეზოლუციის საერთო დოკუმენტის შექმნა შესთავაზა. 21 მარტს, საქართველოს პარლამენტმა რეზოლუციის პროექტი 106 ხმით დაამტკიცა.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის თითქოს სუნთქვის უკმარისობით გარდაიცვალა. ნაწამები ტატუნაშვილის ცხედარი ქართულ მხარეს 26-დღიანი ლოდინის შემდეგ გადმოსცეს.

გიგა ოთხოზორია ოკუპირებული გალის რაიონის სოფელ ნაბაკევის მოსაზღვრე ზუგდიდის სოფელ ხურჩაში 2016 წლის 19 მაისს მოკლეს.სასამართლომ მისი მკვლელი დაუსწრებლად დამნაშავედ ცნო და 14 წლით თავისუფლების აღკვეთა მიუსაჯა. 

თბილისის საპასუხოდ საკუთარი „შავი სიის“ შექმნით დაიმუქრა ოკუპირებული ცხინვალიც.