აგვისტოს ომის 10 წლისთავს ეუთოში საქართველოს მეგობართა ჯგუფი ერთობლივი განცხადებით ეხმიანება

2018 წლის 7 აგვისტოს, ეუთოს ფარგლებში რუსეთ-საქართველოს 2008 წლის აგვისტოს ომის 10 წლისთავთან დაკავშირებით აშშ-ს, კანადის, დიდი ბრიტანეთის, ლატვიის, ლიეტუვას, ესტონეთის, შვედეთის, პოლონეთის, რუმინეთის, ჩეხეთისა და უკრაინის სახელით საქართველოს მხარდამჭერი ერთობლივი განცხადება გაკეთდა. ინფორმაციას საგარეო საქმეთა სამინისტრო ავრცელებს.

ეუთო-ს მონაწილე ქვეყნები გამოხატავენ საქართველოს სუვერენიტეტისა და საერთაშორისოდ აღიარებული საზღვრებში ტერიტორიული მთლიანობის სრულ მხარდაჭერას და მოუწოდებენ რუსეთის ფედერაციას უკან წაიღოს მის მიერ საქართველოს აფხაზეთისა და სამხრეთ ოსეთის რეგიონების ე.წ. დამოუკიდებლობის აღიარება.

განცხადებაში ნათქვამია, რომ რუსეთის მიერ საქართველოში განხორციელებული სამხედრო ინტერვენციიდან 10 წლის შემდეგ, უკიდურესად შეშფოთებულები არიან საქართველოს ტერიტორიების მიმდინარე ოკუპაციით და ხაზს უსვამენ კონფლიქტის მშვიდობიანი გზით მოგვარების აუცილებლობას, გაეროს ქარტიის, ჰელსინკის დასკვნითი აქტისა და საერთაშორისი სამართლის ფუნდამენტური ნორმებისა და პრინციპების პატივისცემის საფუძველზე.

ეუთოში საქართველოს მეგობართა ჯგუფი მოუწოდებს რუსეთის ფედერაციას სრულად შეასრულოს ევროკავშირის მედიაციით მიღწეული 2008 წლის 12 აგვისტოს ცეცხლის შეწყვეტის შეთანხმება, მათ შორის გაიყვანოს საკუთარი ძალები საქართველოს ოკუპირებული ტერიტორიებიდან. განცხადებაში გამოთქმულია ღრმა შეშფოთება საქართველოს აფხაზეთისა და სამხრეთ ოსეთის რეგიონებში ადამიანის უფლებების დარღვევებთან, ასევე რუსეთის სამხედრო წვრთნების ზრდისა და სამხედრო ინფრასტრუქტურის გაძლიერებასთან დაკავშირებით.

მეგობართა ჯგუფი ასევე გმობს საქართველოს მოქალაქეების, იძულებით გადაადგილებული პირების არჩილ ტატუნაშვილის, გიგა ოთხოზორიასა და დავით ბაშარულის მკვლელობის ფაქტებს და მოუწოდებს რუსეთის ფედერაციას, როგორც აფხაზეთისა და სამხრეთ ოსეთის რეგიონებში ეფექტური კონტროლის განმახორციელებელს, არ შეუშალოს ხელი დამნაშავეების პასუხისგებაში მიცემას.

განცხადებაში ასევე აღნიშნულია, რომ ჯგუფის წევრები მიესალმებიან საქართველოს მიერ ევროკავშირის მედიაციით მიღწეული 2008 წლის 12 აგვისტოს ცეცხლის შეწყვეტის შეთანხმების შესრულებასა და საქართველოს მიერ ძალის არ გამოყენების თაობაზე ცალმხრივად აღებულ ვალდებულებას და მოუწოდებენ რუსეთის ფედერაციას, გადადგას საპასუხო ნაბიჯი, დაადასტუროს და შეასრულოს ვალდებულება საქართველოს წინააღმდეგ ძალის არ გამოყენებასთან დაკავშირებით.

ეუთოს მონაწილე ქვეყნები მხარს უჭერენ საქართველოს მთავრობის ახალ სამშვიდობო ინიციატივას „ნაბიჯი უკეთესი მომავლისაკენ“, რომელიც მიზნად ისახავს საქართველოს აფხაზეთისა და სამხრეთ ოსეთის რეგიონებში მცხოვრები მოსახლეობის ჰუმანიტარული და სოციალურ-ეკონომიკური პირობების გაუმჯობესება და დაყოფილ ხალხთა შორის კონტაქტებისა და ნდობის ხელშეწყობას"- ნათქვამია გავრცელებულ განცხადებაში.

ცნობილია, რომ 11 ივლისს, ეუთოს საპარლამენტო ასამბლეამ რეზოლუცია - „10 წელი აგვისტოს ომის შემდეგ“ მიიღო.  ამ გადაწყვეტილებით, ეუთოს საპარლამენტო ასამბლეა რუსეთის ფედერაციას საქართველოს ტერიტორიებიდან სამხედრო ძალების გაყვანის და 2008 წლის 12 აგვისტოს ცეცხლის შეწყვეტის შეთანხმების სრულად შესრულებისკენ მოუწოდებს.

14 ივნისს კი ევროპარლამენტმა საქართველოს შესახებ რეზოლუცია სახელწოდებით „საქართველოს ოკუპირებული ტერიტორიები რუსეთის ინტერვენციიდან 10 წლის შემდეგ“ ხმათა უმრავლესობით დაამტკიცა.

რუსეთსა და საქართველოს შორის კონფლიქტის 10 წლისთავთან დაკავშირებით ევროკავშირის სახელით, განცხადება გაავრცელა ევროკავშირის უმაღლესი წარმომადგენელი ფედერიკა მოგერინმა.

აგვისტოს ომის 10 წლისთავს უკრაინისა და ჩეხეთის საგარეო უწყებებიც გამოეხმაურნენ. განცხადება ქართულ ენაზე Twitter-ზე გაავრცელა ევროსაბჭოს პრეზიდენტმა დონალდ ტუსკმა. 

აგვისტოს ომის 10 წლისთავთან დაკავშირებით საქართველოში მეგობარი ქვეყნების საგარეო საქმეთა მინისტრები ჩამოვიდნენ. 

2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა. 

ჯანდაცვის სამინისტროს მონაცემებით, დაჭრილ-დაშავებულ სამოქალაქო და სამხედრო პირთა რაოდენობა სულ 2 232-ია. მათ შორის, 1045 სამხედრო მოსამსახურე იყო.