პარლამენტის საგამოძიებო კომისია დასკვნას კენჭს დღეს უყრის

ხორავას ქუჩაზე მოზარდების მკვლელობის საქმეზე შექმნილი პარლამენტის დროებითი საგამოძიებო კომისია დასკვნას კენჭს 5 სექტემბერს უყრის. როგორც კომისიის თავმჯდომარემ, „ევროპული საქართველოს“ წევრმა სერგი კაპანაძემ განაცხადა, პლენარულ სხდომაზე შესვენების გამოცხადების შემდეგ საგამოძიებო კომისია რიგით მეოცე სხდომას გამართავს, რომელზეც საბოლოო დასკვნას უყრის კენჭს. ინფორმაციას „ინტერპრესნიუსი“ ავრცელებს.

„მე-19 სხდომა ჩავატარეთ. ამ სხდომის განმავლობაში ჩვენ არამარტო ვიმუშავეთ საქმის მასალებზე და მივიღეთ ახსნა-განმარტებები კონკრეტული უწყებების წარმომადგენლებისგან, არამედ ასევე დავასრულეთ მუშაობა მოხსენებაზე და მისი ხუთივე თავი გავიარეთ. პარლამენტის პლენარული სხდომის შესვენების დროს გვექნება კენჭისყრა მოხსენების საბოლოო ვარიანტზე და იმედი მაქვს, საბოლოო გადაწყვეტილება მიღებული იქნება და დასკვნა წარედგინება პარლამენტს“, - განაცხადა სერგი კაპანაძემ.

3 სექტემბერს საგამოძიებო კომისიამ დასკვნის ახალი ნაწილი გაასაჯაროვა. დასკვნაში მირზა სუბელიანის შესახებ არის საუბარი და წერია, რომ სუბელიანის გამოჩენის შემდეგ საქმე ტენდენციურად წარიმართა.

დასკვნის პირველი და მეორე ნაწილი 1 და 2 სექტემბერსაც გასაჯაროვდა. დასკვნის არსებულ ნაწილებს არ ეთანხმება ქართული ოცნება.

პარლამენტში ხორავას ქუჩაზე მოკლული ორი მოზარდის საქმესთან დაკავშირებით პარლამენტის დროებითი საგამოძიებო კომისია 6 ივნისს შეიქმნა. პარლამენტის საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. მკვლელობის საქმეზე ახალი გარემოებების დადგენის მიზნით, გამოძიებას უშუალოდ გიორგი გახარია ხელმძღვანელობს.

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი  გამოაცხადა,  რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა,  თანამდებობიდან გადადგა.