საგარეო უწყებამ ლუგარის ლაბორატორიის წინააღმდეგ აგორებული კამპანია შეაფასა

საქართველოს საგარეო საქმეთა სამინისტრო რიჩარდ ლუგარის სახელობის კვლევითი ცენტრის შესახებ განცხადებას ავრცელებს. როგორც უწყებაში განმარტავენ, რუსეთის მიზანია, ჩრდილი მიაყენოს საქართველოს თანამშრომლობას მთავარ სტრატეგიულ პარტნიორთან, ამერიკის შეერთებულ შტატებთან.

„ამაზე განცხადებები გააკეთა შესაბამისმა დარგობრივმა უწყებამ, მათ შორის დღესაც. ჩვენ ამაზე გავაკეთეთ კომენტარი. ჩვენი შეფასება ასეთია, რომ ეს არის მორიგი პროპაგანდა იმ სიცრუისა, რასაც მუდმივად ეწევა რუსეთის ფედერაცია და ცდილობს, რომ ამ კონკრეტულ ნაწილში ჩრდილი მიაყენოს ჩვენს თანამშრომლობას ამერიკის შეერთებულ შტატებთან. რა თქმა უნდა, ამაზე ჩვენ შესაბამისი რეაგირება გვექნება იმ ინსტრუმენტებისა და ბერკეტების გათვალისწინებით, რაც საგარეო უწყებას აქვს”, – განაცხადა ვლადიმერ კონსტანტინიდმა.

მანამდე რუსეთის თავდაცვის სამინისტრომ განაცხადა, რომ „აშშ ლუგარის ლაბორატორიაში საქართველოს მცხოვრებლებზე ექსპერიმენტებს ატარებს“. რუსული მხარის მტკიცებით, ტოქსიკური ნივთიერების გამოცდის გამო, 2015 წლის დეკემბერის შემდეგ ათობით ადამიანი დაიღუპა. ეს განცხადება რუსეთის შეიარაღებული ძალების რადიაციული, ქიმიური და ბიოლოგიური დაცვის ჯარების მეთაურმა იგორ კირილოვმა გააკეთა. ამასთან, თავდაპირველად ამ თემაზე პრესკონფერენცია მოსკოვში იგორ გიორგაძემ გამართა.

ამირან გამყრელიძემ კატეგორიულად უარყო ადამიანებთან დაკავშირებული ექსპერიმეტები. მისივე თქმით, ბოლო პერიოდში კვლავ გააქტიურდა რუსულ მედიაში სპეკულაციები ლუგარის სახელობის კვლევით ცენტრზე.

აღსანიშნავია, რომ რუსეთი ამერიკის შეერთებულ შტატებს სთხოვს მიაწოდოს ინფორმაცია საქართველოში ლუგარის ლაბორატორიის საქმიანობის თაობაზე. ამის შესახებ მარია ზახაროვამ ილაპარაკა.

ოკუპირებული სამხრეთ ოსეთის დეფაქტო ხელისუფლება საქართველოში ლუგარის ლაბორატორიის მუშაობის წინააღმდეგია. ოსური მხარე მის ტერიტორიაზე გავრცელებულ დაავადებებს ლუგარის ლაბორატორიას უკავშირებს. 

რიჩარდ ლუგარის სახელობის საზოგადოებრივი ჯანმრთელობის კვლევითი ცენტრი დაავადებათა კონტროლის და საზოგადოებრივი ჯანმრთელობის ეროვნული ცენტრი სრულ ექსპლუატაციაში 2013 წლის აგვისტოში შევიდა. ლუგარის ცენტრი დაავადებათა ქვეყნის ლაბორატორიული ქსელის უმაღლესი დონის დაწესებულებაა, რომელიც წარმოადგენს საქართველოს საზოგადოებრივი ჯანდაცვის სისტემის რეფერალურ ლაბორატორიას.

ცენტრის მშენებლობა დაიწყო 2004 წელს, აშშ-საქართველოს მთავრობებს შორის 1997 წელს ხელმოწერილი ჩარჩო ხელშეკრულების და 2002 წელს აშშ თავდაცვის დეპარტამენტსა და საქართველოს თავდაცვის სამინისტროს შორის გაფორმებული შეთანხმების - „ბიოლოგიური იარაღის განვითარებასთან დაკავშირებული ტექნოლოგიების, პათოგენების და გამოცდილების გავრცელების თავიდან აცილების სფეროში თანამშრომლობის შესახებ“ - საფუძველზე.

ბიოუსაფრთხოების მე-3 დონის სტანდარტებით აღჭურვილი ცენტრის ამერიკელი და ქართველი სპეციალისტები ემსახურებიან ადამიანისა და ცხოველის დაავადებათა გამომწვევი მიკროორგანიზმების აღმოჩენას, ამოცნობასა და ეპიდემიებთან ბრძოლის ეფექტიანი გზების დასახვას. როგორც ქართულმა, ისე ამერიკულმა მხარეებმა არაერთხელ განაცხადეს, რომ ცენტრი მხოლოდ საზოგადოებრივ ჯანდაცვას ემსახურება და მისგან მომდინარე საფრთხეების შესახებ პერიოდულად გავრცელებული ცნობები სრული სიცრუეა.