ამირან გამყრელიძემ ლუგარის ლაბორატორიაზე რუსეთის ბრალდებას უპასუხა

დაავადებათა კონტროლისა და საზოგადოებრივი ჯანმრთელობის ეროვნული ცენტრი რიჩარდ ლუგარის სახელობის კვლევითი ცენტრის შესახებ განცხადებას ავრცელებს.

ამირან გამყრელიძემ კატეგორიულად უარყო ადამიანებთან დაკავშირებული ექსპერიმეტები. მისივე თქმით, ბოლო პერიოდში კვლავ გააქტიურდა რუსულ მედიაში სპეკულაციები ლუგარის სახელობის კვლევით ცენტრზე.

გამყრელიძის თქმით, კვლევით ცენტრის დაფინანსებას უზრუნველყოფს საქართველოს მთავრობა და აღსანიშნავია, რომ ბიოუსაფრთხოების მესამე დონის ლაბორატორიაში წვდომა მხოლო ქართველებს აქვთ.

რიჩარდ ლუგარის კვლევითი ცენტრის ფუნქციონირების გამჭვირვალობასთან დაკავშირებით 14-15 ნოემბერს გაიმართება სამუშაოები, რომლებშიც მონაწილეობას მიიღებენ ბიოექსპერტები 20-ზე მეტი ქვეყნიდან.

ღონისძიებაზე ასევე მოწვეულები არიან რუსი ექსპერტებიც, თუმცა მათი მხრიდან შეთავაზებაზე უარი მიიღეს.

აღსანიშნავია, რომ რუსეთი ამერიკის შეერთებულ შტატებს სთხოვს მიაწოდოს ინფორმაცია საქართველოში ლუგარის ლაბორატორიის საქმიანობის თაობაზე. ამის შესახებ მარია ზახაროვამ ილაპარაკა.

ოკუპირებული სამხრეთ ოსეთის დეფაქტო ხელისუფლება საქართველოში ლუგარის ლაბორატორიის მუშაობის წინააღმდეგია. ოსური მხარე მის ტერიტორიაზე გავრცელებულ დაავადებებს ლუგარის ლაბორატორიას უკავშირებს. 

რიჩარდ ლუგარის სახელობის საზოგადოებრივი ჯანმრთელობის კვლევითი ცენტრი დაავადებათა კონტროლის და საზოგადოებრივი ჯანმრთელობის ეროვნული ცენტრი სრულ ექსპლუატაციაში 2013 წლის აგვისტოში შევიდა. ლუგარის ცენტრი დაავადებათა ქვეყნის ლაბორატორიული ქსელის უმაღლესი დონის დაწესებულებაა, რომელიც წარმოადგენს საქართველოს საზოგადოებრივი ჯანდაცვის სისტემის რეფერალურ ლაბორატორიას.

ცენტრის მშენებლობა დაიწყო 2004 წელს, აშშ-საქართველოს მთავრობებს შორის 1997 წელს ხელმოწერილი ჩარჩო ხელშეკრულების და 2002 წელს აშშ თავდაცვის დეპარტამენტსა და საქართველოს თავდაცვის სამინისტროს შორის გაფორმებული შეთანხმების „ბიოლოგიური იარაღის განვითარებასთან დაკავშირებული ექნოლოგიების, პათოგენების და გამოცდილების გავრცელების თავიდან აცილების სფეროში თანამშრომლობის შესახებ“, საფუძველზე.

ბიოუსაფრთხოების მე-3 დონის სტანდარტებით აღჭურვილი ცენტრის ამერიკელი და ქართველი სპეციალისტები ემსახურებიან ადამიანისა და ცხოველის დაავადებათა გამომწვევი მიკროორგანიზმების აღმოჩენას, ამოცნობასა და ეპიდემიებთან ბრძოლის ეფექტური გზების დასახვას. როგორც ქართულმა, ისე ამერიკულმა მხარეებმა არაერთხელ განაცხადეს, რომ ცენტრი მხოლოდ საზოგადოებრივ ჯანდაცვას ემსახურება და მისგან მომდინარე საფრთხეების შესახებ პერიოდულად გავრცელებული ცნობები სრული სიცრუეა.