ივანიშვილი: სამედიცინო კანაფის შესახებ კანონპროექტის მომზადებაში მეც ვმონაწილეობდი

პარტია „ქართული ოცნების“ თავმჯდომარე ბიძინა ივანიშვილმა ტელეკომპანიების „იმედის“, „პირველის“ და „რუსთავი 2“-ის წამყვანებთან ინტერვიუში კანაფის შესახებ კანონპროექტთან დაკავშირებით განმარტება გააკეთა. მისი თქმით, ამ კანონპროექტში საუბარი მცენარის კოსმეტიკური და სამედიცინო მიზნით წარმოებაზე იყო და არა ნარკოტიკული საშუალების წარმოებაზე. მან იქვე განმარტა, რომ ამ კანონპროექტის განხილვაში პარლამენტში შეტანამდე, თავადაც მონაწილეობდა.

„ჩვენ ვნახეთ საზოგადოების რეაქცია... საზოგადოებას და საპატრიარქოს რეაქციას ანგარიში გავუწიეთ და შევაჩერეთ ეს კანონპროექტი.

მისი რენტაბელობა 500%-ზე მეტია. ძალიან დიდი ობიექტური გათვლებია იმისა, რომ მილიარდი დოლარის და უფრო მეტის ექსპორტი განხორციელდეს 1, 2, 3 წელიწადში...

რა თქმა უნდა შფოთვაზე, რომელიც საზოგადოებამ გამოავლინა, გუნდის მხრიდან ადექვატური რეაქცია ჰქონდა, გაგრძელდება მასზე მსჯელობა მათ შორის საპატრიარქოსთან და თუ ვნახავთ რომ ეს ხიფათის შემცველია გავჩერდებით“, - განაცხადა ივანიშვილმა.

2018 წლის 11 სექტემბერს ცნობილი გახდა, რომ საქართველოს მთავრობა კანაფისგან მედიკამენტების წარმოების და ექსპორტზე გატანის გეგმას იხილავდა. 14 სექტემბერს შსს-მ პარლამენტს კანონპროექტების პაკეტი და მათ შორის კულტივაციის შესახებ კანონპროექტიც წარუდგინა. ინციატივას, რომელსაც მთავრობა მნიშვნელოვან ეკონომიკურ სარგებელს უკავშირებს, სხვადასხვა საზოგადოებრივი ჯგუფის მკვეთრად უარყოფითი რეაქცია მოჰყვა. მეტიც, ეკლესის ზოგიერთი წარმომადგენელი მთავრობას ფაქტობრივად დაემუქრა და კანონპროექტის გაწვევა ურჩია. ხელისუფლებამ განაცხადა, რომ ინიციატივის განხილვა საზოგადოებრივ კონსენსუსამდე გადადო, ეკლესია კი ამბობს, რომ ერთადერთი კონსენსუსი - ინიციატივაზე უარია.